Жоспарлы жұмыстар жүзеге асырылды

Биылғы жылдың басында Семей магистральдық желі бөлімшесі бірқатар жоспарлы шараларды межелеген болатын. Атап айтсақ, транзиттік әлеуетті арттыру мақсатында пойыздардың қозғалыс жылдамдығын сағатына 120-140 км-ге дейін жоғарылату, ол үшін желі бойындағы инфрақұрылымды жаңғырту көзделген еді.

Бір ғана мысал, соңғы бес жылда Семей теміржолы бойынша жалпы көлемі 262 шақырым болатын жолға күрделі жөндеу жүргізілген. Мақсат – темірбетонды шпалдар төсеу, рельстер мен бағыттамалы бұрмаларды ауыстыру арқылы жолдың балдық сапасын жақсарту. Бұл ретте Семей өңірінде 211 шақырым, ал Өскемен өңірінде қозғалыс жиілігі төмен болуы себепті 51 шақырым болатын жол жаңартылды. Ал 73,4 км станциялық жолдарға жаңа шпалдар салынса, негізгі жолдардағы бағыттамалық бұрмалардың 222 жиынтығы ауыстырылған. Жалпы темірбетонды жол төсемдеріне толық көшу үшін алдағы жылдары 366 шақырым жолға күрделі жөндеу жұмыстары жоспарланып отыр.  

Десек те, биылғы жыл жетістікке толы. Ағымдағы жылы жаңа материалдарды қолдана отырып, 61,1 шақырымдық жолға күрделі жөндеу жүргізілді. Күшейтілген орташа жөндеу жұмыстары 11,2 шақырым бойынша жасалынды. Сондай-ақ 11 шақырымдық ескі рельстер ауыстырылған.

– Жаңғырту жұмыстарының нәтижесінде бөлімше бойынша жолаушылар және жүк пойыздарының қозғалысы мен қауіпсіздігі айтарлықтай жақсарады. Бұл орайда 114,55 шақырымға жол машиналары кешенін қолдана отырып жұмыс жүргізілді. Желі бойындағы тал-дарақтарды күзеліп, жол жиектері түзетілді. Мұнымен қоса, шұғыл тежелу оқиғаларының алдын алу, желі қапталындағы төрт түліктің теміржолға шығуын болдырмау үшін соңғы бес жылда 194,8 км қоршау салынды. Бұл бағыттағы жұмыстар әсіресе ағымдағы жылы қарқынды жүргізіліп, жаңадан 63,5 шақырым болатын қоршау орнаттық, – дейді Семей магистральдық желі бөлімшесінің басшысы Айдын Шәукежанов.  

Желі бойында іске асырылған, тағы бір баса атап өтуге тұрарлық іс-шара – теміржолшылардың тұрмыстық жағдайын жақсарту және еңбек өнімділігін арттыру болып отыр. Осынау орайда санитарлық-тұрмыстық ахуалды оңалту үшін биылғы жылы желі бойына жаңадан 10 модульдік ғимарат орнатылыпты.  

Сонымен қатар жергілікті «Теміржолсу-Аягөз» ЖШС күшімен 22 ғимаратта ағымдағы жөндеу жүргізіліп, шалғайдағы учаскелердегі жұмысшылар үшін 70 контейнерден жылыту пункттері қойылды. Күрделі климаттық аймақта еңбек ететін сала қызметкерлері үшін мұның өзі атап өтерлік іс. Бірқатар тораптық станциялардағы инфрақұрылымды қайта құру да маңызды бағыт саналып отыр. Бұл орайда Семей теміржол вокзалының ғимаратын қайта жаңартуға және Өскемен мен Аягөздегі вокзалдарды күрделі жөндеуден өткізуге жобалық-сметалық құжаттамалар әзірлеу басталды. Техникалық әлеуетті жаңарту аясында биылғы жылдың өзінде теміржолшылар игілігі үшін жаңадан 13 көлік алынған. Соның ішінде Семей және Өскемен-1 станциялары үшін жергілікті зауытта құрастырылған автобустар да пайдалануға беріліп отыр.  

Қорыта айтсақ, биылғы жылға жоспарланған жұмыстар толық орындалды деп сеніммен айта аламыз.