Биыл 1400 шақырым темір жол жөндеуден өтеді
«Қазақстан теміржолшысы» газетінің тілшісі
Биыл «Қазақстан темір жолы» ұлттық компаниясы бойынша 1401 км темір жол жөндеуден өтеді. Соның ішінде 566 шақырым жолға күрделі жөндеу жүргізу жоспарланып отыр.
Ағымдағы жылы, сонымен қатар Қазақстан Республикасының мультимодальды әлеуетін дамытуға бағытталған «Достық-Мойынты» учаскесінде екінші теміржол жолын салу, қолданыстағы «Семей-Ақтоғай» теміржол учаскесіне шыға отырып, Қазақстан – Қытай шекарасында «Бақты» үшінші шекаралық теміржол өткелін салу, Алматы теміржол торабын айналып өтетін айналма теміржол құрылысын салу, «Дарбаза-Мақтаарал» теміржол желісін салу жобалары жоспарға сәйкес аяқталады деп күтілуде.
Құрылыс аяқталғаннан кейін қосымша жұмыс орындары құрылмақ, бір ғана жол шаруашылығы бойынша жаңа құрылыс учаскелеріне 500-ден астам адамды қабылдау жоспарлануда.
Сонымен қатар қолданыстағы теміржол инфрақұрылымының өткізу қабілетін арттыру жөніндегі жұмыстар шеңберінде Маңғыстау станциясын дамыту және №2,10,12,15 разъездерінде қосымша жолдар салу көзделіп отыр. Бейнеу – Маңғыстау учаскесінде жөндеу жұмыстары, ал Маңғыстау – Құрық учаскесінде автоблоктау құрылысы және рзд.Р – Боржақты учаскесінде разъезд құрылысы басталады.