Бақты-Аягөз теміржол желісін салу мерзімі ерекше бақылауға алынды
"Қазақстан темір жолы "ҰК" АҚ Басқарма төрағасының міндетін атқарушы Бауыржан Орынбасаров жұмыс сапары барысында Қазақстанның көлік саласының ірі инфрақұрылымдық жобаларының бірі – Бақты — Аягөз теміржол желісінің құрылысын тексерді, деп хабарлайды Rail-news.kz.
Жоба басшылығымен, бас мердігермен, техникалық қадағалау өкілдерімен және жауапты орындаушылармен өткен кеңесте құрылыс қарқыны, объектінің техникамен, еңбек ресурстарымен және материалдармен қамтамасыз етілуі, сондай-ақ жұмыс сапасы, өнеркәсіптік қауіпсіздік және еңбекті қорғау мәселелері қаралды.
Құрылыс барлық учаскелерде бір уақытта жүргізіледі. 20 млн текше метрге жуық жер жұмыстары орындалды, бұл жобалық көлемнің 51% -н құрайды. Осы жылдың қазан айында жер төсемін салуды аяқтау жоспарлануда.
Құрылыс-монтаж жұмыстары барлық жасанды құрылыстарда, соның ішінде 47 көпір, 317 су өткізгіш құбыр және 18 мал айдау жұмыстары бойынша жүргізілуде.
Биыл мердігер 50 шақырым теміржол салуды жоспарлаған болатын. Алайда, ҚТЖ басшылығының тапсырмасы бойынша жұмыс көлемі 70 км-ге дейін ұлғайтылды.
Құрылыс алаңына 856 бірлік техника мен 1 356 маман жұмылдырылды. Қызметкерлер үшін төрт вахталық қалашық салынды: олар - Ай, Шолпан, Үржар және Бақты.
Жоба отандық өндірушілер мен мердігерлік ұйымдардың қатысуымен жүзеге асырылады. Жобаны іске асыруға қазақстандық кәсіпорындардың кең ауқымы тартылды. Рельстерді Ақтөбе рельс арқалық зауыты, бағыттамалық бұрмаларды — "Проммашкомплект" зауыты, темірбетонды шпалдар мен рельсті бекіткіштерді — "Магнетик" компаниясы жеткізеді, темірбетон конструкциялары жергілікті жерде АЗМК-мен бірлесіп өндіріледі, Цементті "Шарцем"ЖШС(Семей қ.) және т. б. жеткізуде.
Жұмыс сапарының қорытындысы бойынша басқарма төрағасының міндетін атқарушы құрылыс кестесінің мүлтіксіз сақталуын, жобаны іске асырудың жоғары сапасын қамтамасыз етуді, жұмыс қарқынын жеделдетуді, қауіпсіздік талаптарын сақтауды тапсырды.
Ұзындығы 303 км болатын Бақты – Аягөз теміржол желісі Қазақстан мен Қытай арасындағы үшінші теміржол шекара өткелінің ашылуын қамтамасыз етеді, бұл көлік дәлізінің өткізу қабілетін жылына 25 млн тоннаға дейін арттыруға мүмкіндік береді.