Ақтөбеде дуалды оқытудан өткен студенттерге еңбек кітапшасы табысталды
Ақтөбе облысы бойынша меншікті тілші
«Самұрық-Қазына» АҚ басқарма төрағасы Нұрлан Жақыпов Ақтөбе облысына жұмыс сапарымен барды. Қор басшысы жаңғырту жұмыстары жүргізілген вокзалдарды аралап, әлеуметтік жобалармен танысты.
Нұрлан Жақыпов Ақтөбедегі теміржол вокзалының жаңғырту жұмыстарымен танысып, жаңартылған инженерлік жүйелер мен жолаушыларға жағдай жасауға бағытталған жұмыстарды көзімен көрді.
«Жұмыстарды белгіленген мерзімде аяқтаумен қатар, олардың сапасы жоғары және қауіпсіз болуы шарт. Жолаушылар үшін заманауи әрі қолайлы жағдайды қамтамасыз ету маңызды», – деді Қор басшысы.
Ақтөбе вокзалында Нұрлан Жақыпов пен Ақтөбе облысының әкімі Асхат Шахаров «Қазақстан темір жолы» компаниясында дуалды оқыту бағдарламасымен оқу-өндірістік тәжірибеден өткен студенттермен кездесіп, оларға еңбек кітапшаларын табыстап, өмір жолдарына сәттілік тіледі.
Айта кетейік, Ақтөбе облысында дуалды оқыту 28 колледжде енгізілген. «Самұрық-Қазына» компаниялар тобында жыл сайын шамамен 10 мың студент дуалды оқыту мен өндірістік практикадан өтіп, бұл жүйе жастарға оқу кезінде еңбек дағдыларын меңгеріп, кейін жұмысқа орналасуға мүмкіндік береді. Қазіргі таңда дуалды оқытуға облыстағы 1104 кәсіпорын тартылып, 8694 студент қамтылған. Оқыту 60 мамандық және 87 біліктілік бойынша жүргізіледі.
Жалпы, Ақтөбе облысында «Самұрық-Қазына» компаниялар тобының атынан қайырымдылық қызметінің бірыңғай операторы – «Samruk-Kazyna Trust» қоры 32 әлеуметтік жобаны жүзеге асырды. Соның ішінде Қордың қолдауымен Ақтөбедегі 10 мектепте жаңа инклюзия кабинеттері ашылғанын ерекше атап өтуге болады. Сапар әрі қарай осы жобалардың бірінде жалғасып, мәртебелі қонақтар заманауи open space кеңістігі қарастырылған Д.Қонаев атындағы мектеп-гимназиясында болды.