Қазақ-өзбек көлік қатынасы жандана түспек
«Қазақстан теміржолшысы» газетінің тілшісі
Коронавирус инфекциясының кең таралуына байланысты елдер арасындағы жолаушылар көлігі қатынасы тоқтап қалғаны белгілі. Жуырда өткен көлік мәселелері жөніндегі Қазақстан-Өзбекстан жұмыс тобының отырысында тараптар жолаушылар тасымалын қалпына келтіруге ниетті екендерін білдірді, деп хабарлайды Rail-news.kz.
Көлік және коммуникация министрлігінің баспасөз қызметі таратқан ақпаратқа сүйенсек, Өзбекстан Көлік министрінің орынбасары Абдусамат Муминовтің және Қазақстанның Индустрия және инфрақұрылымдық даму министрінің орынбасары Берік Камалиевтің басшылығымен өткен келіссөздерде ынтымақтастықтың перспективалық бағыттары, сондай-ақ жүк тасымалдау жағдайларын жақсартуға байланысты мәселелер қарастырылған.
Кездесу барысында тараптар эпидемиологиялық талаптарды жеңілдетудің және жерүсті көлігімен жолаушылар тасымалын қалпына келтіру процестерін жеделдетудің маңыздылығы сөз болған. Сондай-ақ, жұмыс тобы автомобиль және теміржол көлігі саласындағы инфрақұрылымдық жобаларды қарастырған. Олар: Түркістан-Шымкент-Ташкент жоғары жылдамдықты теміржолы және Үшқұдық-Қызылорда көлік дәлізі. Сонымен қатар, тараптар Өзбекстан мен Қазақстанның әуе аумақтары бойынша әуе қозғалысына қызмет көрсетуде жаңа бағыттарды енгізу мәселесі талқыланып, кездесу қорытындысы бойынша қол жеткізілген уағдаластықтар бойынша тиісті Хаттамаға қол қойылған.