Су тасқыны төнген жағдайда тұрғындарды эвакуациялауға бір жарым мыңнан астам вагоны дайын
«Қазақстан теміржолшысы» газетінің тілшісі
Қазақстанда су басу қаупі бар аймақтардан адамдарды эвакуациялау үшін 1,6 мыңнан астам теміржол вагоны дайын тұр. Бұл туралы ҚР Үкіметі отырысында Индустрия және инфрақұрылымдық даму министрі Қайырбек Өскенбаев мәлімдеді.
Су тасқыны қаупінің дер кезінде алдын алу және жою, сондай-ақ пойыздардың үздіксіз және қауіпсіз қозғалысын қамтамасыз ету мақсатында ҚР ИИДМ темір жолдарды су тасқыны кезеңіне дайындау бойынша жұмыстар жүргізуде. Атап айтқанда, «ҚТЖ» ҰК» АҚ басшылығының бұйрығымен жолдар мен жол бойындағы теміржол нысандарын қорғау бойынша арнайы іс-шаралар кешені енгізілді.
Қазіргі уақытта көпірлер, құбырлар мен дренаждық құдықтарды қар мен мұздан тазарту, сондай-ақ тау және су бұрғыш арықтарды, науалар мен кюветтерді ашу бойынша дайындық жұмыстары жүргізілуде. Мамандар су қоймалары мен агротехникалық бөгеттердің жай-күйін тексеріп, ТЖ бойынша облыстық бөлімшелермен өзара іс-қимыл алгоритмдері пысықталды.
Министрдің ақпараты бойынша, жолдар мен теміржол құрылыстарын қорғау үшін 2 550 текше метр кесек тас және 9 мың кондициялық емес темір-бетон шпалдары дайындалған. Техника мен материалдардың дайындығы 100% құрайды.