Каспийдегі халықаралық круиз келесі жылы ашылады
«Қазақстан теміржолшысы» газетінің тілшісі
Каспийдегі халықаралық круиз келесі жылы іске қосылуы мүмкін. Қазақстан-Түркіменстан-Иран-Әзірбайжан-Ресей мемлекеттерінің арасын жалғайтын шеңберлі круиздік маршрут құрылатыны туралы ҚР Көлік комитеті төрағасының міндетін атқарушы Қасым Тілепов мәлімдеген еді, деп хабарлайды Rail-news.kz.
– Каспий айдынында круиздік туризмді дамыту бағытында шектесіп жатқан 5 мемлекет өз тарапынан тиісті жұмыстарды атқарып, негізгі мәселелерді шешіп жатыр. Мысалы, біз жақтан Ақтау қаласының қалай түрленгенін көріп отырсыздар. Жағалау абаттандырылып, қонақүйлер бой көтерді. Маңғыстау облысының, Ақтау қаласының туризм саласындағы әлеуеті зор. Біздің ендігі күтіп отырғанымыз – круиз лайнері. Оны Ресей тарапы Астраханьда салып жатыр. Келесі жылы салынып болатын болар, – деді комитет өкілі.
Сондай-ақ, ол аталған круиз лайнерінің қандай маршрутпен қатынайтынын айтты.
«Маршрут Астраханнан бастап Ақтауға, Ақтаудан Түркіменстанның «Аваза» демалыс базасына, одан әрі қарай Иранның Намирабадына, Намирабадтан Бау мен Махачкалаға қатынайды. Осылайша болашақта 5 мемлекетті аралайтын шеңберлі туристік маршрут болады», – деді Қасым Тілепов.