Темір жол бойында ұрлық-қарлық азаймай тұр
«Қазақстан теміржолшысы» газетінің тілшісі
Пойыздар қозғалысы қауіпсіздігін қамтамасыз ету бағытында теміржолшылар тұрақты түрде профилактикалық шаралар жүргізіп келеді. Алайда, темір жол бойында ұрлық-қарлық оқиғасы азаймай отыр.
Мәселен, жыл басынан бері ҚТЖ магистральдық желісінде жолдың жоғарғы құрылымының бөлшектерін, яғни түйіспелі төсемдер, болттар және т.б. ұрлаудың 44 жағдайы тіркелген. Қонаев станциясында теміржолшылар мен желілік полиция бөлімі қызметкерлерінің бірлескен рейді барысында темір жол бөлшектерін ұрлаған 1998 және 2003 жылғы жас жігіттер ұсталды. Теміржолшылар мұндай бұзушылықтар жолаушылар мен тасымалданатын жүктер үшін ауыр зардаптары бар, жылжымалы құрамның жолдан шығып кетуіне, стратегиялық объектілердің бұзылуына әкелуі мүмкін екенін айтады.
– Теміржол инфрақұрылымы элементтерін ұрлау оқиғалары ең көп болатын өңірлер ретінде Алматы, Қарағанды, Ақмола, Павлодар, Маңғыстау және Жамбыл танылуда. Алматы жол дистанциясы шегінде темір жолдың жоғарғы құрылымы элементтерін ұрлау жиілеп кетті. Тек соңғы бір жарым айда түнгі уақытта 72 астам жол төсемдері мен 200 түйіспе болттары ұрланған. Мұндай жағдайлардың алдын алу үшін желілік полиция бөлімі қызметкерлерімен бірлескен рейдтер жүргізудеміз, бірақ сұқ қолдар тыйылмай отыр, – дейді Алматы магистральдық желі бөлімшесінің директоры Асқар Жексенбиев.