Маңғыстау станциясынан жүретін пойыздарға күніне 8-10 тоннадай көмір кетеді

Жолаушы вагондарының жай-күйі, жалпы пойыздарды жылыту мәселесі қалай шешілуде деген сұрақтармен «Вагонсервис» АҚ Маңғыстау телімінің бастығы Нұржан Жұбанисовқа хабарласқан едік.

Оның айтуынша, түбек теміржолында қатты отыннан мәселе жоқ. Қорда жиналған көмір жеткілікті. №077-078 «Алматы-Маңғыстау» пойызында болған жағдайға қатысты да ойын білдірді. Ол жолы да пойызға әдеттегідей жергілікті жерден қажет көмір берілген. Десек те, оны қалай қолданады және вагонның техникалық жағдайы бұл мекеменің құзырынан тыс нәрсе екен. Вагон Маңғыстауға тиесілі болмағандықтан оның ТО-1 қызметі де Алматыда атқарылатын көрінеді. «Ал біздің вагондардың ішіндегі орташа жылулық +18-220 C шамасында сақталады. Вагондарды осы температурада ұстау үшін Маңғыстау станциясынан жүретін пойыздарға күніне 8-10 тоннадай көмір кетеді» дейді ол.  

Көмір сұранысқа қарай артып не кеміп отырады. Яғни күн суыса артық, жылыса кем жағылады. Қазір Маңғыстау станциясынан тәулігіне 8-10 тонна, айына 250-300 тонна шамасында жұмсалуда екен.  

– Өткен жылдың қаңтар айынан бастап есептегенде осыған дейін 12 ай ішінде құрамдарға барлығы 826 тонна 330 кг көмір беріліпті. Қоймамызда әлі 635 тоннадан астам көмір қоры бар. Қатты отыннан тапшылық болмайды, – деп сендірді «Вагонсервис» АҚ Маңғыстау телімінің бастығы Нұржан Жұбанисов. 

Өткен айда Алматыға жарысқа бара жатқан маңғыстаулық жасөспірімдердің ата-аналары балалары мінген вагонның суықтығын алға тартып, оны ауыстыруды талап еткен жанжал туындағаны белгілі. Нәтижесінде Маңғыстаудан Алматыға бағыт алған пойыз бір жарым сағатқа кешігіп қозғалған еді. Ата-аналар талабы орындалып, жас спортшылар басқа вагонмен кетті. Осы оқиға әлеуметтік желіде тарағалы пойыздардағы жылу мәселесі жиі көтерілуде.