Ақтау порты Qingdao Port-пен ынтымақтастық туралы келісімге қол қойды

Ақтау және «Shangdong Port Group» (SPG) тобына кіретін Qingdao Port сауда порттары SPG делегациясының Қазақстанға сапары аясында ынтымақтастық туралы келісімге қол қойды, деп хабарлайды Rail-news.kz.  

Тараптар тәжірибе мен ақпарат алмасу бойынша тығыз өзара іс-қимыл және бірқатар мәселелер бойынша: персоналды даярлау, пайдалану процестерін оңтайландыру, логистика бойынша ықтимал ынтымақтастық туралы уағдаласты. «Жасыл» және «ақылды» порт салу саласындағы ынтымақтастықты кеңейту жоспарлануда.

Кездесу барысында тараптар өздерінің мүмкіндіктері мен перспективалық даму жоспарларын таныстырды, сондай-ақ ТХКБ бағыты бойынша транзиттік тасымалдар тиімділігін арттыру үшін қазақстандық және қытайлық тараптардың қолданыстағы инфрақұрылымы мен артықшылықтарын пайдаланудың маңыздылығын атап өтті.

Shandong Port Group (SPG) - жүк айналымы бойынша әлемдегі бірінші порттық тобы. Топқа бизнестің 12 сегментінде жұмыс істейтін 12 компания мен 4 порт кіреді: кеме қатынасы, сауда, логистика, ғылыми-техникалық әзірлемелер, жабдықтар өндірісі және т. б.