Әйелдер вагонына сұраныс жоғары
«Қазақстан теміржолшысы» газетінің тілшісі
«Жолаушы тасымалы» АҚ-ның соңғы жылдары іске қосқан сервистік жобасының бірі – әйелдерге арналған вагондар. 5 бағыттағы пойыздар құрамында жолаушылары тек әйелдер, тек нәзік жан иелеріне қызмет көрсететін вагондар болды.
Жоба ел ішінде қолдау тауып, мұндай вагондардың санын көбейтуге өтініш-тілек көп түсті. Өткен жылы елімізде 154 мың жолаушы әйелдер осындай ерекше статусы бар вагондар қызметін пайдаланған. Биылғы жылы ұлттық тасымалдаушы сол жобаны тағы да пилоттық режимде жалғастырмақ.
Яғни, биыл әйелдер вагоны тағы үш маршруттың пойыздарына жалғанбақ. Бұрын Алматы-Маңғыстау, Алматы-Өскемен, Павлодар-Түркістан, Маңғыстау-Семей, Атырау-Астана бағыттарындағы пойыздарда ғана болса, енді әйелдер вагоны Астана-Алматы, Астана-Шымкент, Алматы-Ақтөбе бағыттарындағы пойыздарда да пайда болады.
Айта кетейік, бүгінгі таңда «Жолаушы тасымалы» АҚ паркінде 2100 астам жолаушылар вагоны бар, оның ішінде 108 электр пойызының вагондары. ҚТЖ жолаушылар вагон паркін жаңарту бойынша мақсатты және кезең-кезеңімен жұмыс жүргізуде. 10 жыл ішінде вагон паркі 50% жаңартылды. 2023 жылы 100 жаңа вагон сатып алу жоспарлануда. Ал 2030 жылға дейін Қазақстан мен Швейцария президенттерінің қатысуымен Женевада өткен инвестициялық дөңгелек үстел барысында қол қойылған "ҚТЖ" ҰК" АҚ мен Stadler арасындағы стратегиялық ынтымақтастық туралы келісім шеңберінде тағы 537 жолаушылар вагонын сатып алу көзделген.