Хакатоннан зор әсер алып қайттым – HR маманы
Атырау облысы бойынша меншікті тілші
«Кадр бәрін шешеді» деген қағида бүгінгі күні де маңызын жойған емес. Қай ұжымда да жұмыстың оң бағытта жүруін персоналмен жұмыс істейтін мамандар шешеді. Сондықтан олармен жұмыс қаншалықты жақсы жолға қойылған болса, соншалықты еңбек өнімділігі де жоғары болады.
Жуырда Астана қаласындағы «ҚТЖ ҰК» АҚ-ның қызметкерлерді оқыту және дамыту орталығында «Ортақ мәселе – ортақ шешім!» тақырыбымен өткен алғашқы HR-Хакатонға Атырау магистральдық желі бөлімшесінің персоналды басқару бөлімінің бастығы Анар Жалғасбаева қатысып қайтты. Ұжымдағы бірлікті нығайту, проблемаларының балама шешімдерін командалық негізде іздеу, тәжірибе алмасу, бөлісу, еңбек ұжымдарында әлеуметтік тұрақтылықты қалыптастыруды мақсат тұтқан шара қатысушыларға зор әсер сыйлаған.
– Бұл шара аймақтық және желілік HR-қызмет басшыларына арналды. Негізгі бағыты – өндірісте жасайтын жұмысшыларға жақсы жағдай жасау, олардың жұмысқа деген ынтасын арттыру негізінде болды. Алғашқы HR-Хакатон жоғары деңгейде өтті. Соның ішінде тәжірибесі мол, білікті эксперттер өткізген шеберлік сабақтары өте жақсы ұйымдастырылған, персоналды басқару жұмыстары бойынша, еңбек дауларын шешуде берері көп болды. Жалпы біз бұл шарадан зор әсер, үлкен мотивация алдық. Өз жұмысымызға басқа қырынан қарауға мүмкіндік берді. Сондықтан осындай шаралар жиірек өтіп тұрғаны дұрыс болар еді, – дейді ол.
Шараға әр өңірден барлығы 45 адам қатысыпты. Олар шеберлік сабақтарын тыңдауға қатысып, диалогтық негізде өз пікірлерін білдіріп, талқылап, ұсыныс айтып қана қоймай, 5 командаға бөлініп, күрмеулі ситуациядан шығу бойынша «Билетсіз жолаушы», «Машинист көмекшісін оқыту», т.б. әртүрлі тақырыптарды қорғаған. Бір сөзбен айтқанда, компания бойынша өткен алғашқы HR-Хакатон жаңа адамдармен танысқысы келетін, өзін жетілдіруге ұмтылатын және жаңа нәрселерді білгісі келетін мамандарға арналған өте қажетті іс-шара болғаны анық.