Іздеуде жүрген шетел азаматы Ақтөбе вокзалында ұсталды
Ақтөбе облысы бойынша меншікті тілші
Теміржол сақшылары вокзал маңынан іздеуде жүрген көрші Ресей азаматын ұстады. «Алаяқтық» бабымен заңбұзушылық жасаған азамат қолхатпен жіберілді.
Ақтөбе станциясындағы желілік полиция бөлімі «Құқықтық тәртіп» жедел-профилактикалық іс-шарасын өткізді. Қоғамдық тәртіпті сақтау, қылмыстың алдын алуға бағытталған жұмыстар кезінде барлығы 49 әкімшілік құқық бұзушылық анықталып, бірнеше адам жауапқа тартылды. Вокзалдың іші-сырты, перрон бойы және теміржол өткелдерінде бақылау жұмыстары күшейді. Нәтижесінде қоғамдық орындарда масаң күйде жүрген 4 адам, жарамсыз жеке куәлікпен жүрген 2 Қазақстан азаматы және көші-қон заңнамасының талаптарын бұзған бір шетел азаматы жауапқа тартылды. Сонымен қатар Әкімшілік Кодексінің басқа да әртүрлі баптарымен 37 әкімшілік құқықбұзушылық қозғалды.
«Ақтөбе станциясындағы желілік полиция бөлімінің қызмет көрсету аумағында қылмыстық іс бойынша іздеуде жүрген Ресей азаматы ұсталып, өз еркімен еліне қайту туралы қолхатпен жіберілді», – деп хабарлайды желілік полиция бөлімінің өкілдері.
Сонымен қатар, теміржол сақшылары «Ақтөбе-Жіңішке» станция аралығында жүрген 31 жастағы жүргіншіден ұсақ көлемде есіртке затын тауып, сараптамаға жіберді.