Қазақстан өзінің транзитті ел екенін дәлелдей түсті – ҚТЖ төрағасы
"Қазақстан теміржолшысы" газетінің тілшісі
Соңғы үш жылда Қазақстан темір жолы тасымал бойынша тарихи жетістіктерге жетуде. Осы жылдың тоғыз айының қорытындысы бойынша жүк айналымы 7%-ға артып отыр. Бұл туралы «ҚТЖ» ҰК» АҚ Басқарма төрағасы Нұрлан Сауранбаев Астанада өтіп жатқан VI Халықаралық «New SILK WAY» көлік-логистикалық бизнес-форумында айтты.
Оның айтуынша, негізгі өсім транзит арқылы болып отыр, оның үлесі 25 пайыз. Мұндай көрсеткіштер Қазақстанның транзитті ел екенін айқындай түседі.
Сонымен қатар ол тасымалды арттыру үшін инфрақұрылымдық әлеуетті жақсартуға көңіл бөлініп жатқанын атап өтті. Оның ішінде Достық-Мойынты желісінің екінші жолы салынып жатыр және Мемлекет басшысының тапсырмасымен тағы үш жобаның құрылысы басталады. Ол Бақты-Аягөз, Алматы айналма жолы және Дарбаза-Мақтаарал желісі. Оған қоса Шығыс-батыс және Солтүстік-оңтүстік бағыттары маңызды болып отыр.
Дегенмен, бұл жобаларды іске асыруда бір қатар қиындықтар бар деген Басқарма төрағасы тасымалдаудың мультимодельді нұсқасын құру үшін қажетті басты трендтерді атап өтті.
«Қазір жаһандық тасымал өзгергенін көріп отырмыз. Мәселен, Солтүстік-оңтүстік сияқты жобалар алдыңғы орынға шығуда. Ресейдегі 300 млн тоннаға жуық жүк шығу жолын іздеуде. Ал, Қазақстан арқылы Иран мен Қытайға жеткізілетін жүгі 6 есеге артты. Сондықтан біз осындай жүк легіне бейімделе білуіміз керек. Екіншіден әлемдегі ең ірі тасымалдаушылар бізге назар аудара бастады. Бұл елімізге ірі ойыншылардың келіп, инвестиция құйуына жағдай жасайды», – деді Н. Сауранбаев.
Айта кетсек, іс-шараға 23 елден 500-ден астам делегат қатысып жатыр.