Арыс станциясында локомотив бригадаларының демалыс үйі жөнделді

Түркістан облысының Арыс станциясында локомотив бригадалары үшін демалыс үйіне жөндеу жүргізілді. Екі қабатты ғимарат күрделі жөндеуден өтті.  

Жөндеу барысында жылыту, жарықтандыру жүйелері, есіктер, терезелер, линолеум ауыстырылды. Душ, жуынатын бөлме, асхана, қабырғалар мен төбелер күрделі жөндеуден өтті. Тәулік бойы жұмыс істейтін жайлы демалыс бөлмесі, асхана жиһазбен және тұрмыстық техникамен жабдықталды.

Демалыс үйінің жалпы ауданы 530 шаршы метрден асады. Ғимаратта екі адамды – машинист пен көмекшіні орналастыруға арналған 16 бөлме бар.

Тәулік ішінде Арыс станциясындағы демалыс үй-жайы 12 локомотив бригадасын қабылдайды. Мұнда сапарлар арасында Жамбыл, Түркістан және Шымкент деполарының машинистері мен көмекшілері шаршағандықтарын басады.

«ҚТЖ-Жүк тасымалы» ЖШС локомотив бригадалары үшін демалыс жағдайларын жақсарту бойынша жұмысты жалғастыруда. Биыл Арыс, Пресногорьковская, Сексеуіл, Ақсу-1, Маңғыстау, Ақбидайық, Сарышаған, Шу, Құлсары, Қарағайлы, Жезқазған, Саяқ, Сарыағаш, Қызылорда, Мақат, Ақтөбе, Шиелі, Қызылту, Шелек, Бескөл, Жаңа-Есіл, Көкшетау, Никелтау, Әйтеке би станцияларында локомотив бригадаларының 24 демалыс үйі жөнделді. Локомотив бригадаларының тағы 14 демалу үйіне жөндеу жұмыстары жүргізілуде.