Бейтаныс әйел вокзалға жарылғыш зат қойылғанын хабарлады
Абай облысы бойынша меншікті тілші
Өткен жұма күні кешкілік семейлік теміржол вокзалы мен желілік полиция қызметкерлері аяқ асты әуре-сарсаңға түсті. Себебі кешкі сағат 18 шамасында полицияға қоңырау шалған бейтаныс әйел вокзалға «жарылғыш зат» қойылғаны туралы хабар берген.
Осылайша, аталмыш нысанға жедел түрде барлық арнайы қызмет өкілдері жылдам жетіп, вокзал қызметкерлері мен жолаушыларды қауіпсіз жерге шығарады. Оқиға орны оқшауланып, бірден қауіпті затты анықтау жұмыстары басталып кетеді. Вокзалдың қуыс-қуысын, барлық түкпірін толық тінтіп, тексеріп шыққан соң ешқандай жарылғыш заттың жоқ екендігі анықталды. Телефон соққан әйел жалған хабар бергені мәлім болды. бір сағатқа жетер-жетпес уақыттан кейін вокзал қызметі қайта жанданды.
Аталмыш жайт терроризм жайлы жалған хабар беру бойынша тіркеуге алынып, ҚР ҚК 273 бабы бойынша іс қозғалды. Күдікті тұлға анықталған жағдайда оған 5000 АЕК көлемінде айыппұл салынады немесе белгілі мерзімге бас бостандығынан айырылуы мүмкін. Қазіргі таңда жалған хабар берген азамат іздестіріліп жатыр. Тергеу амалдары жүргізілуде. Оқиға кешкі мезгілде орын алғандықтан жолаушылар пойызының қозғалысы мен кестесіне айтарлықтай әсер еткен жоқ.