Алты айда республикаішілік бағытта 35 млн тонна көмір тасымалданды

Биылғы 2023-2024 жылғы жылыту маусымында халықты көмірмен толық қамтамасыз ету үшін мамыр мен қазан аралығында республикаішілік бағытта 35 млн тонна көмір тасымалданған. Бұл өткен жылдың сәйкес кезеңімен салыстырғанда 237 мың тоннаға көп.  

Соның ішінде ЖЭО, яғни жылу электр орталықтарына 30,5 млн тонна көмір жеткізілген. Бұл да алдыңғы жылға қарағанда 876 мың тоннаға артық. Ал коммуналдық-тұрмыстық секторға 4,5 млн тонна жеткізіліпті. Осы ретте теміржолшылардың жұмыс тобы қатты отынның қалай тасымалданып жатқанын тексеру үшін Астана станциясындағы кіреберіс жолдардағы көмір тиеу жұмыстарын тексерді.  

Мамыр айынан бүгінге дейін Астана қаласының халқы үшін 320 мың тонна көмір жеткізілген, ал негізгі жоспардағы тұтыну көлемі 244 мың тоннаны құрайды. Тұйықтарда көмір қоры жеткілікті екені анықталды, тиеу мен жеткізуде жұмыс бір қалыпты, халық арасында осындай кезде болатын дүрбелең байқалмайды.  

 – Күніне біздің қоймадан 120-130 көлікке көмір тиеп жіберіп отырмыз. Бүгінгі таңда бұл тұйыққа тәулігіне 5-8 вагон келеді. Жалпы 300 тонна көмір қорымыз бар. Шұбаркөл көміріне сұраныс көп. Астана бойынша біз сияқты тұйықтар көп. Теміржолмен байланысты ешқандай мәселе туындамады, – дейді теміржол бойындағы бір көмір қоймасының бастығы Ерлан Кашкенов.  

Бүгінгі таңда көмір тасымалы үшін «Қазтеміртранс» компаниясының 19,7 мың ашық вагоны жұмылдырылған, соның ішінде 10,3 мыңы энергетикалық көмірді тасымалдауға, 9,4 мыңы коммуналдық-тұрмыстық көмірді жеткізуге қолданылуда. Сонымен бірге көмірдің қай тасымалы болса да тиеу жұмыстары күшейтілген және үздіксіз сипатта атқарылып отыр. Берілген өтінімдерге сәйкес жүк жөнелтушілерді жылжымалы құраммен дер кезінде қамтамасыз ету бойынша барлық тиісті шаралар қабылдануда.