Атырауда вагон шығаратын зауыт салынады
Атырау облысы бойынша меншікті тілші
Атырауда темір жол вагондарын шығаратын зауыт салынбақшы. Бұл туралы аймақ басшысы Серік Шапкенов ҚР Президенті жанындағы Орталық коммуникациялыр қызметі алаңында мәлімдеді.
Облыс басшысының айтуынша, болашақта өңірде жүзеге асырылатын ірі инвестициялық жобалардың бірі – теміржол вагондарын шығаратын зауыт салу. Жоба құны 76 млрд теңгені құрайды, жүзеге асырушы – «ТексолТранс» ЖШС. Ол компания мұнай-газ саласына қызмет көрсетеді және вагондарды жөндеумен айналысады, сол бағытта жұмысын жалғастыра береді. Ал жаңа жобаның ауқымдылығы орасан, қуаттылығы – жылына 6 мың вагон шығару. Жобаны жүзеге асыру аясында 1700 адам жұмыспен қамтылатыны да жағымды жаңалық болмақ. Жобаны іске асыру мерзімі – 2024- 2026 жылдар аралығы.
Атырау темір жолының бастығы Аслан Базарғалиевтің айтуынша, зауытта әуелі жартылай вагондар мен платформалар шығарылады деп жобаланған. Толық қуатына көшіп, өндіріс игерілген соң цистерналар да шығарыла бастайды. Зауыт қаладан 5 шақырым жердегі Махамбет станциясы маңында салынады деп жоспарлануда. Қазіргі уақытта құжаттамаларын дайындау жұмыстары жүргізіліп жатқан көрінеді.