Семейлік теміржолшылар қар сенбілігін өткізді

Қыстың соңғы айы да аяқталуға жақын. Семей ЖТ бөлімшесінің теміржолшылары көктемгі су тасқынынан келер қауіпке даярлық шараларын қызу қарқынмен бастап кетті. Осы орайда өткен аптаның соңғы жұмыс күндері барлық тораптық станцияларда арнайы қар сенбіліктері ұйымдастырылды.

Бөлімше басшысы Алмас Сейсемқановтың жедел бұйрығы аясында өткен қар сенбілігіне желі бойындағы барлық мекеме қызметкерлері қатысты.  

Ең ауқымды жұмыс әсіресе сыныптан тыс Семей станциясында жүргізілді. Соңғы апталарда өңірге қар жылдағы мөлшерден аса көп мөлшерде түсіп, жергілікті теміржолшыларды біршама машақатқа салған болатын. Сондықтан, станцияда өткен қар сенбілігі ауқымды жүріп, көп адам қатысты.  

Екі күн бойы атқарылған қар шығару жұмыстарының нәтижесінде Семей станциясының парк жолдарынан 18 платформа болатын тығыздалған салмақтағы қар шығарылып, арнайы полигонға апарып төгілді. Бөлімшедегі барлық станциялар бойынша шығарылған қардың текше метрі есептеліп жатыр.  

Қазіргі күннің өзінде өңірде көктем лебі сезіліп, қардың күрт еруі байқалуда. Сондықтан, қар шығару жұмыстары жеделдетілген түрде жүргізілуде.  

Айта кетерлігі, жұмыла кірісудің нәтижесінде станциялық жолдар мен барлық бағыттама бұрмалар бойы толықтай қардан тазартылды. Дегенмен бұл су тасқынының алды алынды деген сөз емес. Желі бойындағы теміржолға қарасты барлық көпірлер мен құбырлар қардан аршылып жатыр.  

– Алдағы ауа райы көңіл көншітпейді. Синоптиктердің сөзіне сенсек, осы аптаның ішінде Абай облысы бойынша +5 градус жылы болмақ. Қауіп, әрине аяқ астынан. Сондықтан да қызыл судың алдын алу шараларына бел шешіп кірістік. Көктемгі су тасқынының алдын алуда жергілікті теміржолшылар аймақтағы барлық мекемелер мен ұжымдар арасында алдыңғы орында тұр, – дейді бұл орайда Семей станциясы бас инженерінің міндетін атқарушы Бекзат Кәрімханов.