Бектенов көлік инфрақұрылымын жаңғырту барысын пысықтады

Үкімет басшысы Олжас Бектенов көлік саласындағы ірі инвестициялық жобалар бойынша кеңес өткізіп, Президенттің негізгі көлік жобаларын жүзеге асыру жөніндегі тапсырмасының орындалу барысын тексерді.  

Теміржол көлігі саласында жалпы құны 2,3 трлн теңгені құрайтын бес ірі жоба бар. «Достық – Мойынты» учаскесіндегі (836 км) екінші жолдың құрылысы, Алматы станциясының айналма жолы (75 км), «Дарбаза – Мақтаарал» темір жол желісінің (152 км) құрылысы жүзеге асырылуда. Ал «Қызылжар – Мойынты» учаскесінде жұмыстар басталды. ҚТЖ деректері бойынша бірінші жартыжылдықта аяқталады деп күтілуде. Сондай-ақ, қытаймен үшінші теміржол өткелі болатын «Бақты – Аягөз» (272 км) жобасы бар.  

«Достық – Мойынты» және Алматы станциясы айналма жолы жобалары мерзімінен бұрын орындалуда. Сонымен қатар жұмыс теміржол желісінің жекелеген учаскелерін қамтиды. Мемлекет басшысының тапсырмасына сәйкес, 2029 жылға дейін жалпы 11 мың шақырым темір жолды жөндеуден өткізу жоспарланса, биыл жалпы сомасы 177 млрд теңгеге 1 480 шақырым жол жаңғыртылады. Сонымен қатар 2025 жылы аяқталатын 125 вокзал кешенін реконструкциялау жұмыстары жүргізіледі.  

Ал су көлігі саласында Ақтау портын тереңдету жұмыстарын бастау осы жылдың шілде айында жоспарлануда. Сонымен қатар 2025 жылы сауда флотын дамыту аясында 8 бірлік кеме, оның ішінде 6 құрғақ жүк кемесі және 2 паром сатып алынады. Премьер-министр жоспарланған барлық жобаны кешенді әрі жүйелі түрде жүзеге асырудың маңыздылығын атап өтті. Көлік саласы соңғы 5 айда 24% өсімді көрсеткен. Жиын соңында Көлік министрлігіне, «Самұрық-Қазына» қорына және өзге де жауапты ұйымдарға бірқатар тапсырма берілді.