60-қа жуық студент ҚТЖ мұражайында болды
Республика күні қарсаңында «ҚТЖ» ҰК» АҚ орталық теміржол көлігі мұражайында «Astana IT University» ЖШС колледжінің 60 студенті үшін экскурсия ұйымдастырылды, деп хабарлайды Rail-news.kz.
Экскурсия барысында қатысушылар Қазақстанның теміржол саласының қалыптасуы және дамуы тарихымен танысып, жаңғыртудың негізгі кезеңдері, техникалық жетістіктері мен теміржолшылардың ел дамуына қосқан үлесі туралы білді.
Студенттер үшін танымдық викторина ұйымдастырылды, оның барысында олар жоғары деңгейдегі эрудиция мен теміржол тарихына қызығушылық танытты. Викторина қорытындысы бойынша ең белсенді студенттер алғыс грамоталарымен марапатталды.
Мұражай меңгерушісі Ақмарал Молдашева жастарды отандық көлік тарихын зерттеуге тартудың маңыздылығын атап өтті:
«Қатарынан екі экскурсия мен викторинаны ұйымдастыру үлкен дайындықты талап етеді, бірақ студенттердің шынайы қызығушылығын, олардың эмоцияларын және Қазақстанның темір жолдары туралы көбірек білуге деген ұмтылысын көргенде — барлық күш-жігердің босқа кетпегендігін түсінесің», - деп атап өтті ол.
Іс-шара жылы және достық көңіл-күйде аяқталды – студенттерге тәттілер ұсынылды.
