Заңдағы жаңа нормалар түсіндірілді

Жуырда Семей магистральдық желі бөлімшесі қызметкерлері үшін мән-мағынасы ерекше жиын өтті. Теміржолшылар алдында Абай облысының дін мәселелерін зерттеу орталығының теолог мамандары ақпарат беру жұмыстарын жүргізіп, өзекті мәселелерді бірігіп талқылады.

Атап айтсақ, дәріс барысында діни экстремизм мен радикализмнің алдын алу және дәстүрлі рухани құндылықтарды насихаттау мен зайырлы қоғамдағы Ата заңның үстемдігі бағытында кеңінен сөз болды.  

Сонымен қатар ағымдағы жылғы дін саласындағы заңнамаға енгізілген бірқатар өзгертулер бойынша ақпараттық-түсіндіру іс-шаралары жүргізілді.  

Басқосу барысында әсіресе Семей теміржол вокзалының қызметкерлері үшін маңызды мәліметтер берілді. Соның ішінде жалған телефон терроризмі, қауіпті заттар анықталған кездегі іс-әрекет алгоритмі жайлы әңгімелесу өтті.  

Тереңірек қозғалған бір мәселе – биылғы жылғы 12 шілдеден бастап қоғамдық орындарда адамның түр-сипатын тануға кедергі келтіретін киімдерді киюге тыйым салуды көздейтін Заңдағы жаңа норма жайында болды. Күшіне енгізілген бұл өзгеріс қауіпсіздік мақсатында қолға алынып отыр. Бұл қауіпсіздік шарасы азаматтардың дін еркіндігін немесе жеке басының құқығын шектемейді. Қазіргі күні теологтар мен тәртіп сақшылары бірлесіп қаладағы қоғамдық орындарда түсіндіру жұмыстарын кеңінен жүргізуде.  

Жиын барысында сонымен қатар жолаушылар пойызы арқылы діни әдебиетті және діни мазмұндағы өзге де материалдарды тасымалдау мен тарату, яғни теміржол вокзалдарындағы заңсыз миссионерлік жұмыс жүргізудің қолданыстағы заң бойынша жауапкершілігі жайында да кеңінен пікір өрбіді.  

– Әсіресе теміржол вокзалының қызметкерлері үшін құқықтық-заңдық сауаттылық ешқашан артық етпейді. Радикализм мен экстремистік көріністердің алдын алу, сонымен қатар қоғамдық орындардағы қатерді болдырмау мақсатында мұндай іс-шаралардың берері мол, – дейді бұл орайда Семей магистральдық желі бөлімшесі бойынша азаматтық қорғаныс бөлімінің инженер-технологы Еркін Спанов.