Ақтау порты: Иран ҚР теңіз инфрақұрылымымен танысты
Қазақстан Республикасына ресми сапары аясында Иран Ислам Республикасының Жол және қала құрылысы министрі Фарзане Сәдег ханым бастаған делегация Ақтау халықаралық теңіз сауда портына барды, деп хабарлайды Rail-news.kz.
Сапар барысында «АХТСП» ҰК» АҚ Басқарма төрағасының міндетін атқарушы Ғалым Айтжанов Иран делегациясын порттың қызметімен, оның өндірістік қуаттылығымен және ағымдағы операциялық мүмкіндіктерімен таныстырды. Қонақтар назарына кәсіпорын жұмысының негізгі бағыттары, іске асырылып жатқан инфрақұрылымдық жобалар, сондай-ақ Транскаспий халықаралық көлік бағдарының маңызды буыны ретінде портты одан әрі дамыту перспективалары ұсынылды.
Қазақстан мен Иран арасындағы көліктік-логистикалық өзара іс-қимылды кеңейту, Каспий теңізіндегі теңіз тасымалдарының тиімділігін арттыру және өңірлік көлік дәліздерінің өзара байланысын нығайту мәселелеріне ерекше назар аударылды.
Жұмыс кездесуінің қорытындысы бойынша тараптар жүк тасымалдау көлемін ұлғайтуға, сауда-экономикалық байланыстарды нығайтуға және теңіз логистикасы мен порт инфрақұрылымы саласындағы бірлескен бастамаларды іске асыруға бағытталған әріптестік қатынастарды одан әрі дамытуға өзара мүдделілігін растады.