Тоқаев: көлік-логистика саласы ел дамуының негізгі бағыттарының бірі
Кеше Парламент палаталарының бірлескен отырысында Қасым-Жомарт Тоқаев көлік-логистика саласын ел үшін маңызды бағыттардың бірі деп атады деп хабарлайды Rail-news.kz.
Ол жақында Брюссельде Еуроодақ көшбасшыларымен өткен келіссөздер барысында Транскаспий халықаралық көлік маршрутын дамыту мәселесіне ерекше назар аударылғанын еске салды.
Соңғы алты жылда Орта дәліз арқылы жүк тасымалының көлемі бес есеге өсіп, жылына 4 миллион тоннадан асты. Бұған дейін біз Брюссельдегі Орта дәлізді дамыту жөніндегі келісімдер мен еуропалық институттардың Қазақстанның көлік күн тәртібіне қатысуы туралы жазған болатынбыз.
Теміржол саласына тоқталған Президент Достық – Мойынты бағытындағы екінші жолдар мен Алматыны айналып өтетін теміржол желісінің іске қосылғанын атап өтті. Биыл Мойынты – Қызылжар және Дарбаза – Мақтаарал желілерінің құрылысы аяқталуы тиіс. Ал 2027 жылы Бақты – Аягөз теміржол желісі пайдалануға беріледі.