Теміржолшыларды белсендік танытуға шақырды
Абай облысы бойынша меншікті тілші
Семей өңірінде ПЧ-39 мекемесінің мәжіліс залында жергілікті теміржолшылардың басқосуымен мән-мағынасы ерекше жиын өтті.
Аталмыш шараға ұлттық компанияның бас инженері Батыр Котырев қатысып, келелі баяндама жасады. Жиын барысында қозғалған негізгі тақырып алдағы маусым айының 9-ы күні өтетін Қазақстан Республикасының кезектен тыс президент сайлауының маңыздылығы турасында өрбіді. Батыр Котырев өз сөзінде, еліміздің бүгінгі таңдағы экономикалықәлеуметтік жетістіктеріне тоқтала келіп, қазіргі таңдағы қарқынды дамумен қатар, соңғы жылдары өндіріс барысына енгізілген жаңашылдықтар жайында да әңгімелеп берді.
– Алда өтетін сайлауға міндетті түрде қатысып, еліміздің президентін таңдау – әрқайсымыздың азаматтық борышымыз. Сайлауда біз лайықты өмір, өркендеу, еліміздегі тұрақтылық үшін, сенімді түрде алға жылжу, ізімізді жалғар ұрпақтарымыздың ертеңі үшін дауыс береміз,– деді бас инженер.
Сондай-ақ, ол қоғамдық-саяси өмірде белсенділік танытып жүрген теміржолшылар аталмыш науқанға қатысып, еліміздің ертеңі үшін өз таңдауын жасаудан тыс қалмайтынына сенім білдірді.