Семейдегі көпір күрделі жөндеуден өтуде
Абай облысы бойынша меншікті тілші
Семейдегі Ертіс өзені үстінен салынған теміржол көпірін күрделі жөндеуден өткізу жұмысы басталып кетті. Нысанның зерттеу-сынамалық жұмыстары 20 жылға жуық жүргізіліп, тек өткен жылы ғана толық аяқталған болатын. Қазіргі күні Семей ЖТ бөлімшесі бойынша темір конструкциялы көпірге байланысты барлық құжаттамалар жинақталды.
Түрксіб құрылысының бұл бірегей туындысының қолданысқа берілгеніне биыл тұп-тура 90 жыл толып отыр. 1929 жылы салынып біткен. Жалпы ұзындығы 643,9 метрді құрайды. 2006 жылы алматылық көпір сынамасын жүргізетін компания зерттемелік жұмыстар жасап, нәтижесінде нысанның темір конструкциялары қанағаттанарлық жағдайда емес деп таныған болатын. Осыдан соң көпірдегі пойыз жылдамдығы 25 км/ сағатқа шектелген еді. Сондай-ақ, ауыр салмақты жүк пойыздарына да елеулі шектеу бар.
Ал, күрделі жөндеу жұмыстарын алматылық мердігер мекеме «Мостоотряд-8» ЖШС біртіндеп бастап кетті. Белгіленген жоспар бойынша биылғы жылы атқарылар шаралардың 70 пайызы орындалмақ. Қалған жұмыстар көлемді болуы себепті келер жылы жалғасатын болады. Бұл мақсатта 1 млрд 918 млн теңгенің қаражаты бөлінген болатын. Қазіргі күні жұмыс күші мен қажетті техникалар жеткілікті деп бағалануда.
Оңтүстіктен келген көпір жөндеуші меймандарға Семей жол дистанциясының мамандары нұсқамалық жәрдем көрсетуде. Осыған дейін көпірге ағымдық жөндеу жүргізіп, күтімде ұстап келген жолшылар нысандағы жұмыстардың уақытында аяқталуына мүдделі болып отыр.