Кәсібі сайыс жеңімпаздары
«ҚТЖ-Жүк тасымалы» АҚ – Жамбыл ЖТ бөлімшесі филиалы осымен үшінші жыл қатарынан мекемелер арасында байқау ұйымдастырып келеді. Байқау қорытындысы бойынша өндірісте үздік нәтиже көрсеткен екі жас теміржолшы алғашқы жылы Түркия елінде демалса, былтыр электровоз машинисінің екі көмекшісі Египетті аралап қайтқан.
Атап өтерлігі, «Қазақстан темір жолы» АҚ-ның республика бойынша 14 бөлімшесі болса, мұндай байқау филиал директоры Берік Ақшаловтың ұйымдастыруымен тек Жамбыл бөлімшесінде ғана өткізіліп келеді. «Мамандығының майталманы» деп аталатын кәсіби сайыс биыл вагоншылар арасында өткен. Бұл шараның ерекшелігі сол, оған тек 35 жасқа дейінгі жастар қатыса алады. 7-8 адамнан құралған комиссия әділ шешім қабылдап, байқаудың шынайы өтуін бөлімше басшысы тікелей қадағалайды екен.
Биылғы байқауда 30 жас бағын сынаған. Үміткерлер алдымен теміржол саласы бойынша тест сұрақтарына жауап беріп, екінші кезеңде өндіріс басына барып істәжірибелерімен бөлісті. Бұлардың өзі алдымен бөлімшеге қарасты Сарышаған, Шу, Луговой сынды станциялардан іріктеледі.
Конкурс тамыз айының соңында өткізіліп, 9-17 қыркүйек аралығында жеңімпаз деп танылған тараздық Рахман Құдайберген мен рысқұловтық Асхат Қарақожаев бір апта Дубайда демалу жүлдесін жеңіп алды. Күні кеше саяхаттан оралған екі теміржолшы бөлімше директоры Берік Сағымбекұлының қабылдауында болды.
– Екеуміздің де шетелге алғаш шығуымыз екен. Ел көріп, жер көрудің қандай керемет екенін сөзбен айтып жеткізу қиын. Бес жұлдызды қонақ үймен, ұшаққа билетпен, ассуымыз бен қыдыруымызға дейін қамтамасыз етіп берген басшылық пен кәсіподақ ұйымына үлкен алғысымызды айтамыз! Мұндай мүмкіндік кез келген ұжымда, кез келген маманға беріле бермейді. Бұл саяхат бізге үлкен мотивация сыйлады, алдымызға биік мақсаттар қойып, жұмысымызды бар ынта-жігермен атқаруға серпін берді. Ал Дубай жайлы айтар болсақ, оны әсіресе түнде тамашалаған керемет екен. Алдымен, әрине, Бурдж Халифа ғимаратын, түрлі-түсті, билейтін субұрқақтарды тамашаладық. Фуджэйра әмірлігіне де жолымыз түсті. Қандастарымыз елге дұғай-дұғай сәлем жолдады, – деп саяхатшы екі жас алған әсерлерін жарыса әңгімеледі.
– Біздің де көздеген негізгі мақсатымыз осы. Жастарға дем беріп, жұмыстарын ширату, биік белестерді бағындыруға ынталандыру, жол көрсету болатын. Бұл байқау бөлімшеміздің тарапынан бұдан кейін де ұйымдастырыла беретін болады. Тек бір ғана емес, екі бірдей жеңімпаз таңдауымыздың бірнеше себебі де бар. Ең бастысы, қанша дегенмен, алыс жол, жат жұрт болғандықтан қызметкерлеріміз бірбіріне серік болсын деген мақсат еді, – деп пікір білдірген Берік Ақшалов бұдан бөлек те, жалпы жас мамандарды ғана емес, қызметкерлердің бәрін ынталандыру мақсатында ұйымдастырылатын іс-шараларымыз жыл бойына жалғаса беретінін жеткізді.