Пойыздар неге жиі кешігеді – «Жолаушылар тасымалы» жауабы

«Жолаушылар тасымалы» АҚ бас директоры Жәнібек Тайжанов пойыздардың кестеге сәйкес жүрмеуінің себебін түсіндірді, деп хабарлайды ҚазАқпарат.

«Пойыздардың кешігуі бойынша бұған дейін де бірнеше рет ресми түсінік берілді. Жаз мезгілінде 3 сағатқа, кейде 6 сағатқа дейін кешігулер болды», - деп жауап берді Жәнібек Тайжанов БАҚ өкілдерінің сауалына.

Сондай-ақ, «Жолаушылар тасымалы» кешігудің басты үш себебін атап өтті.

Бірінші себеп - жыл сайын теміржолдарда жөндеу жұмыстары жүргізіледі. Мақсат – теміржол қатынасы қауіпсіздігін қамту.

Екінші себеп – пойыздардың жолдан шығып кетуі. Осыған байланысты пойыздар кешігеді. Теміржолды қалпына келтіру белгілі бір жұмыстарды атқаруды қажет. Бұл пойыздардың кешігуіне алып келеді.

Үшінші себеп – климаттық факторлар. Яғни, ауа райы қолайсыздығы, боран, қар тағы сол сияқты.

Оның айтуынша, биыл пойыздар кідірісінің басым бөлігі магистральдық жолдардар бойындағы жұмыстармен байланысты.

Одан бөлек, «Жолаушылар тасымалы» АҚ бас директоры жолаушылар пойыздардың кешігіп келген әрбір сағаты үшін өтемақы талап ете алатынын еске салды.

«Әр сағат үшін жолаушы билет құнының 3% мөлшерінде өтемақы ала алады. Біз бұл туралы вокзалдағы кассаларда айтып отырмыз. Бұл ақпарат барлық жерде бар», - деп толықтырды ол.

Бұған дейін елімізде 654 ескі вагон жолаушы тасымалдап жүргені туралы хабарлаған едік.