Қаныш Сәтбаевтың 125 жылдығына арнайы безендірілген пойыз жолға шықты
"Қазақстан теміржолшысы" газетінің тілшісі
Биыл ғалым-геолог, металлогения ғылымының және мектебінің негізін қалаушы, Қазақ КСР Ғылым академиясының тұңғыш президенті және академигі Қаныш Имантайұлы Сәтбаевтың туғанына 125 жыл толып отыр.
Қазақтың біртуар азаматының мерейтойы ҚТЖ назарынан тыс қалмады. 20 шілде күні Астана қаласындағы Нұрлыжол вокзалында Қаныш Сәтбаевтың 125 жылдығына орай арнайы безендірілген жолаушылар пойызы жолға шықты. Безендірілген пойыз Астана-Жезқазған бағыты бойынша қатынайды.
Қазақтың көрнекті қайраткерлеріне арналған тақырыптық жобаны Ұлттық тасымалдаушы «Қазақмыс» компаниясымен бірлесіп алғаш рет іске асырып отыр. Пойыздың сыртқы жағында Қаныш Сәтпаевтың өмір сүрген жылдары мен оның мерейтойлық портреті бейнеленген. Жоба ұлы қазақ ғалымының есімін қастерлеуге бағытталған.
№65-66 жолаушылар пойызының бастығы Мадияр Бектасов бұл пойыз тектен текке безендірілмегенін, өйткені академик Қаныш Сәтбаевтың өмірі осы Жезқазған қаласымен тығыз байланысты екенін айтады.
«Биыл Қаныш Сәтбаев атамыздың 125 жылдығы. Бұл пойыздың арнайы безендірілуіне келсек, ғалым осы Жезқазған қаласында барлау жүргізіп мыс, жез кендерін тапқан. Ол кісінің еңбегі ұмытылмас үшін әрі жастарға өнеге болсын деп пойызымызды арнайы безендіріп отырмыз», - дейді пойыз бастығы.
Қаныш Сәтбаев 1899 жылы 12 сәуірде дүниеге келген. Оның есімі Қазақстанның өнеркәсібі мен ғылымының қалыптасу кезеңімен тығыз байланысты.
Қ.И.Сәтбаев ̶ Қазақстан жер қойнауының пайдалы қазбаларын, Жезқазғандағы мыс қорларын ашқан алғашқы қазақ геологы, Қазақстан Ғылым Академиясының ұйымдастырушысы және тұңғыш президенті, Кеңес Одағының шығыс республикаларынан шыққан КСРО ҒА-ның тұңғыш академигі, КСРО және Қазақ КСР Жоғарғы Кеңестерінің депутаты, Мемлекеттік және Ленин сыйлықтарының лауреаты, төрт мәрте Ленин орденімен, 2-дәрежелі Отан соғысы орденімен марапатталды.
Пойызға мініп жатқан жолаушылар Қаныш Имантайұлының бейнесімен безендіруді қолға алған ҚТЖ-ның бастамасын оң бағалап, бұл әсіресе өсіп келе жатқан жастарға өнеге боларлық іс деген пікірлерін білдірді.
«Өзім Сәтбаев қаласының тұрығынымын әрі оны мақтан тұтамын. Бүгін академиктің 125 жылыдғына арнайы безендірілген пойызбен жолға шығып барамыз, бұл біз үшін үлкен қуаныш. Ол кісінің Жезқазған, қазіргі Сәтбаев пен Қарсақбайға сіңірген еңбегі зор. Сол кісінің бастамасымен бұл өңірлерде мыс қорыту зауыттары мен кен орындары ашылды. Елімізде Қаныштай мықты ғалымның шыққанына қуанамыз. Ол кісінің жолын жалғастыратын жастарымыз көп болсын», - дейді жолаушы Айжан Сүлейменова.
