Жұрт сарыла күткен «Атырау-Дина Нұрпейісова» пойызы жүре бастады
Атырау облысы бойынша меншікті тілші
Облысішілік «Атырау-Дина Нұрпейісова» бағытындағы теміржол пойызы 2021 жылғы 17 тамыздан бастап жүре бастайды деп хабарлады облыстық жолаушылар көлігі және автомобиль жолдары басқармасы, деп хабарлайды Rail-news.kz. Бұл – атыраулықтардың көптен күткен қуанышы. «Otpan Logistic» компаниясы аталған бағыттағы жолаушылар тасымалы тендерін жеңіп алған. Жол жүру билеттері теміржол вокзалы кассаларында және интернет желісі арқылы сатылымға шықты. Пойыз күн сайын Атырау станциясынан жергілікті уақытпен 11:00, Д.Нұрпейісова бекетінен жергілікті уақытпен 18:42-де жүреді. Пойыз құрамында 1 плацкарт, екі жалпы вагон бар. Айта кетерлігі, Дина Нұрпейісова станциясы Ресей Федерациясының Астрахань облысымен шектеседі. Учаске көлемі 7 шақырымдай жерді қамтығанымен, көтерер жүгі қомақты. Себебі, еларалық жүктер алдымен осы станция арқылы өтеді. Станция бастығы Қ.Хисиннің айтуынша, тәулігіне 15 жұпқа дейін пойыз, мыңға жуық вагон қабылдап-жіберетін кездер болады. Станция басында Атырау жол дистанциясының жолшылары, ШЧ-8 дистанциясының байланысшылары, ВЧД-1 станциясының вагоншылары да өз қызметтерін орындауда. Станция вокзалының 30 адамдық күту залы бар.