Ақтөбе темір жолының ұжымы құрметті теміржолшы 75 жасқа толуымен құттықтады
Ақтөбе облысы бойынша меншікті тілші
Ақтөбелік ардагер, құрметті теміржолшы Болатбай Исағалиев 7 қарашада 75 жасқа толады. Өмірінің елу жылға жуығын жол шаруашылығына арнаған ардагермен қызметтес болғандар оның шойын жолдың күтімі мен бабын кереметтей меңгерген нағыз кәсіби теміржолшы болғанын айтады. Бүгінде ел ағасы болып отырған ардагер теміржолшы 1963 жылы Гурьев жол дистанцисында жол монтері болып еңбек жолын бастайды. 1969 жылы Орал электромеханикалық институтында білім алып, жолдамамен Қарағанды жол дистанциясына барып, жол шебері, аға жол шебері болып еңбек етеді. Сол кезде-ақ болашағынан зор үміт күттірген жас маман шебер ұйымдастырушы ретінде көзге түскен екен. 1972 жылы Қарағанды бөлімшесіне жол шаруашылығы жұмыстары бойынша қозғалыс қауіпсіздігі ревизоры болып ауысып, төрт жылдай қызмет атқарады. Теміржолшының біліктілігі мен тәжірибесіне көз жеткізген басшылық оны Қарағанды жол дистанциясы бастығының орынбасары етіп тағайындайды. Кейін Нұра жол дистанциясын басқарып, Қарағанды бөлімшесінде жол бөлімінің бастығы қызметін де атқарды. Теміржол саласында мол тәжірибе жинақтаған Болатбай Еділұлы 1992-1998 жылдары Батыс Қазақстан темір жолының жол қызметін басқарды. Аймақта тұралап қалған жол шаруашылығын жандандыру жұмыстарына үлкен үлес қосты. 1998-2001 жылдары Ақтөбе облысы бойынша жол бөлімшесі өкілдігін басқарса, 2001-2011 жылдары Магистральдық желі басқармасының облыстық жол зертханасының меңгерушісі болып қызмет атқарып, зейнетке шықты. Ақтөбе темір жолының басшылығы мен ұжымы, кешегі-бүгінгі әріптестері, ізбасар інілері Болатбай Еділұлын мерейтойымен шын жүректен құттықтап, мықты денсаулық, ұзақ өмір тілейді.