Жамбылдық жас машинист «Нұр Отан» басшылығының Алғыс хатын алды
Атасы – машинист, әкесі – машинист, өзі – машинист. Қарғабаевтар әулетінің өкілі Жандос, шынында да, машинистер әулетінің мұрагері екені рас.
Жамбыл локомотив пайдалану депосында еңбек ететін жас жігіт тәуелсіздікпен түйдей құрдас, 1991 жылы 19 қыркүйекте туған. Көзін ашып көргені теміржол болған соң Жандос көп ойланған жоқ, мектеп бітіре сала Тараз қаласындағы №13 теміржол колледжіне жол тартты. Емтиханнан сүрінбей өтіп, үш жыл бойы теориялық білім жинақтап, 2010 жылы диплом алып шықты.
«Атам Жазықбек 1929 жылдан 1958 жылға дейін паравоз машинисі болған ғой. О-о, ол кісінің әңгімелері ғажап енді, ол уақытта теміржолшы деген ең құрметті мамандық болған, сонымен қатар қиындығы да көп сала еді ғой. Көп дүние қолмен атқарылды. Атам да осал емес, әйтпесе ол тұста қазақтардың дені қара жұмыста жүрген жоқ па...», – деп әңгіме айтады Жандос Қарғабаев.
Әкесі Болатбек 1982 жылдан кешеге дейін машинист болып, екі жыл бұрын қабылдаушы қызметінен зейнет демалысына шығыпты. Жамбыл локомотив пайдалану депосына жұмысқа тұрған Жандос үш жыл машинистің көмекшісі болды. Сосын арнайы курстан өтіп, емтихан тапсырып, машинист куәлігін алады. Бүгінде жолаушылар пойызын жүргізеді. Теміржолшылар әулетінің саладағы еңбек өтілі бүгінде жүз жылдан асқан. Жандостың отбасы бұл санды арттыра түсетін болады. Өйткені, оның жары Әсел де Жамбыл жүк тасымалы бөлімшесінде еңбек етеді. Тасымалдау құжаттарын өңдеу операторы. Екеуінің екі баласы өсіп келеді, «болашақ машинистер» деп қалжыңдайды кейіпкеріміз. Несі бар, «жақсы сөз – жарым ырыс» деген, әулет жолын жалғайтын солар болмағанда, кім?! Жуырда Тәуелсіздік құрдастары елордада бас қосты. Оларды арнайы қабылдаған «Нұр Отан» партиясы төрағасының бірінші орынбасары Бауыржан Байбек теміржолда династиялық дәстүрді жалғастырып жүрген жас машинисті Алғыс хатпен марапаттады.