Егемендікпен тел өскен ақтөбелік машинист ҚТЖ «100 жас есім» жобасына енген
Ақтөбе облысы бойынша меншікті тілші
Осыдан тура 30 жыл бұрын ел азаттығын жариялап, Тәуелсіздік алған тұста өмірге келген ақтөбелік Әсет Нетжанов – екінші класты тепловоз машинисі.
«Тәуелсіздіктің құрдасы болу үлкен жауапкершілік деп сезінемін. Елмен бірге есейіп келеміз. Қазақ елінде салтанат құрған достық, экономикалық өрлеу, саяси тұрақтылықтың арқасында замандастарымыз армандарына қол жеткізіп жүр. Еліміздің болашағы жарқын. Мен оған сенемін.Теміржолда жастардың жан-жақты дамуына, еркін еңбек етуіне толық жағдай жасалған. Компания тарапынан үнемі қолдауды сезінеміз», – дейді Әсет Нетжанов.
Әсет еңбек жолын 2009 жылы бастаған. Ақтөбедегі теміржол колледжінде білім алып, локомотив пайдалану депосына машинист көмекшісі болып жұмысқа қабылданғанда он сегізден енді асқан бозбала өзін кәдімгідей ересек сезінгенін айтады. Үш жыл жауапкершілікпен тиянақты еңбек етіп, тәп-тәуір тәжірибе жинақтаған жасты депо басшылығы 2011 жылы білімін жетілдіруге жібереді. 2012 жылы тепловоз машинисі болып, көмекшімен сапарға шығады. Содан бері темір тұлпардың тізгініне ие, жас та болса деподағы мақтаулы машинистің бірі. Қоғамдық шараларға да белсене араласып, қолайлы еңбек жағдайын жасау, өндірістік қауіпсіздік пен еңбек қорғау деңгейін арттыру тақырыбында бірнеше топтық жобаларға қатысқан ол «ҚТЖ» ҰК» АҚ-ның «100 жас есім» жабасына енген.
«Топтық жобалар дайындадық. Арнайы киімдер теміржолшыларға ыңғайлы әрі қауіпсіз болсын деген ойларымызды ұсындық. Қайырымдылық шараларын ұйымдастырамыз. Жалпы компания тарапынан ұйымдастырылған шараларға жастар белсене қатысады. Тәуелсіздіктің тұғыры берік болсын! Басқасының бәрі өз қолымызда», – дейді кейіпкеріміз.
Әсет Нетжанов биыл Нұр-Сұлтан қаласындағы оқу орталығында білім жетілдіріп, екінші класты машинист куәлігін алды. Жауапкершілігі жоғары, сенімді жас маман мекеме басшылығы тарапынан депо кезекшілігі қызметіне ұсынылған.