Шуда ардагерге ескерткіш тақта орнатылды
Шу белгі беру және байланыс дистанциясының ұжымы, осы кәсіпорынды 1997-2002 және 2007-2016 жылдары басқарған Құрметті теміржолшы Қартайған Аязбаевты құрметпен еске алып, дистанция кеңсесіне тақта орнатты.
2020 жылы 69 жасында өмірден өткен Қартайған Бөлегенұлы саналы ғұмырын болат жолға арнап, еңбек жолын осы саламен тығыз байланыстырған өз ісінің нағыз маманы болды. 1968 жылы Шоқпар орта мектебін бітіргеннен кейін Шу белгі беру және байланыс дистанциясында байланыс электромонтеры болып еңбек жолын бастаған ол 1969-1974 жылдары Ташкент теміржол көлігі инженерлері институтында оқып, жоғары білім алады. Жолдамамен Ерейментау белгі беру және байланыс дистанциясына барып, электромеханик, аға электромеханик, аға инженер, дистанцияның бас инженері, бастығы болып қызмет атқарды.
1987 жылдан бастап Шу белгі беру және байланыс дистанциясында бас инженері, бастығы, ал 2002-2004 жылдары Алматы белгі беру және байланыс бас дистанциясының директоры болды. 2007 жылға дейін «Қазақстан темір жолы» ҰК» АҚ –«Жамбыл магистралдық желі бөлімшесі» филиалын басқарды. 2007-2016 жылдар аралығында Шу белгі беру және байланыс дистанциясының бас инженері қызметінде болып, 2016 жылдың 1 ақпанынан зейнет демалысына шығады.
Қартайған Бөлегенұлы теміржолдағы СОБ және байланыс құрылғыларының техникалық тұрғыда жетілдіріліп, олардың күтімін жақсартуға, эстетикалық талаптардың сақталуына ерекше еңбегі сіңген, шаруашылық жұмыстарын ұйымдастыруда аса білікті маман ретінде өзін көрсете білген жан болды. Целиноград-Екібастұз, Шығанақ-Шу, Жамбыл-Шу-Отар аралықтарын электрлендіру жұмыс- тарына белсене атсалысқан азамат.
– Қартайған ағамыздың әкесі Бөлеген өмірін жолшы болып өткізген жан еді. «Тәрбие – талбесіктен» демекші, мектебі де әке өнегесі болған ғой. Көп сөзден гөрі нақты істі жаны қалайтын азамат еді. Жауапты, өз ісіне тиянақты, бастамашыл жастарды жан-тәнімен қолдайтын қасиеті болатын. Осы өңірде бұл салада жүрген мамандардың көпшілігі – сол кісінің шәкірттеріміз, – деді шарада сөз алған дистанция басшысы Қайрат Сазаев.