Семейде танымал теміржолшыға ескерткіш белгі қойылды
Абай облысы бойынша меншікті тілші
Семей жүк тасымалы бөлімшесінде теміржол саласындағы ерен еңбегімен ел есінде қалған тұлғаларға ескерткіш белгі қою үрдісі қалыптасқан. Бұл жолы аймаққа танымал теміржолшы болған даңқты вагон қараушыға ескерткіш белгі қойылды.
Құрметті теміржолшы, «Ленин» және «Еңбек Қызыл Ту» ордендерінің иегері Риза Баяхметов ғұмыры ғибратқа толы жан болғанын еске алған замандастары жып-жылы естеліктерімен бөлісті.
Жергілікті кәсіподақ ұйымының бастамасымен әрі еңбек ардагері туыстарының ұйытқы болуымен құрметті теміржолшы тұрған үйдің қабырғасына ескерткіш тақта ілінді. Шараға бөлімше бойынша салалық кәсіподақ ұйымының төрағасы Алик Досанов, ардагер-теміржолшы Мақсұт Көшжанов және марқұмның көзкөрген әріптестері мен туыстары жиналды.
Риза Ахмадиұлының салаға сіңірген зор еңбегі жайлы шәкірттері келелі сөз қозғады. Әсіресе, аймақтағы вагон шаруашылығын өркендету жолындағы аңызға бергісіз еңбектерін еске алысты.
– Күні кеше баршамызға бағыт сілтеп, ұстаз болған аға буын өкілі Риза ақсақал сынды жандардың есімдері кейінгі буын жадынан өшпеуі тиіс деп санаймыз. Олардың еңбектегі жетістіктері, өз қызметтеріне адалдықтары бүгінгі жастарға үлгі, – деп пікір білдірді Семей вагон депосы – ВЧД-23 мекемесінің кәсіподақ ұйымы төрағасы Ертай Темірбеков.