Жолдың жайын жолшы білер
Абай облысы бойынша меншікті тілші
Биыл құрылғанына 110 жыл толатын Семей теміржолында кәсіби мамандардың үлкен шоғыры қалыптасқан. Солардың арасында жол саласында 30 жылдан бері табан аудармастан еңбек етіп, мінсіз қызметімен мерейге бөленіп келе жатқан Нұрлыбек Жулупбаев туралы әріптестерінің айтары көп.
Бүгінде Семей жол дистанциясында жол шебері-жол бригадирі қызметін атқаратын Нұрлыбек Төлеубекұлы дәл осы дистанцияда, осынау околодкада қатардағы жолшы болып еңбек жолын бастапты. Соңғы 20 жыл бойы жол шебері, бригадирі болып еңбек етуде.
– Нұрлыбекті алғаш жұмысқа қабылданған күннен бастап білемін. Екеуміздің жолымыз түйіскен жылдар көп болды. Нағыз майталман маман деуге лайық азамат. 2007 жылдан бастап аға жұмысшы, жол шебері бола отырып, Семей станциясының солтүстік мойнағының үздіксіз жұмысын қамтамасыз етуде. Ол өз қарамағындағы бригадамен бірге магистральдық және қабылдау-жөнелту жолдарындағы 53 бағыттама бұрмаға қызмет көрсетеді. Бұл – біздің дистанция бойынша ең жауапты телім, – дейді бұл орайда әріптесі жайлы пікір білдірген ПЧ-39 мекемесінің директоры, Құрметті теміржолшы Рахат Ботаспаев.
Бір околодкада 30 жыл қызмет істеу осындағы жұмыстарды бүге-шігесіне дейін білуге мүмкіндік беретіні белгілі. Бұл ретте Нұрлыбек Төлеубекұлы уақытпен санаспай қызмет етеді. Жол шаруашылығының қыр-сырын, әдіс-тәсілін толық меңгерген. Дистанциядағы кез келген жұмысты бір өзі атқарып кете беретін әмбебаптығы да бар. Нұрлыбектің әсіресе жол машиналарының «құлағында ойнайтын» өнері барша әріптестерін тәнті етеді.
– Бүгін түнде станциялық жолдарды қардан тазаладық. СМ-2 қар тазалағыш машинасымен 69-шы, 50-51-ші жолдар ақ ұлпадан аршылды. Бір түнде 500 текше метр болатын қар шығарылды. Биыл өңірімізде қатты аяз болмағанымен қалың қар біршама қиындық туғызып тұр, – дейді жол машинасынан түскен Нұрлыбек.
Табиғаты қатаң Семей өңірінде қысқы мезгілдегі жол күтімі оңай шаруа емес. Нұрлыбек бастаған жол бригадасы өз қарамағындағы бағыттамалы бұрмаларды қар мен мұздан уақытылы тазартуымен қатар, кей кездері пневмоүрлегіштер тәулік бойы жұмыс істеп тұрады.
– Пойыз қозғалысында кедергі туындамауы үшін бұл жұмыстың маңызы зор. ЭЦ автоматика болғандықтан үнемі қозғалыста болуы тиіс. Біздің телім бойынша жүк пойыздарының ағыны көп. Жылжымалы құрамдарды тоқтатпау – басты міндетіміз, – дейді Нұрлыбек Төлеубекұлы. Иә, жолдың жайын жолшы білмегенде кім білсін?!
Адал еңбек, мінсіз қызметі үшін көптеген марапаттар иеленіп, мерейге бөленіп келе жатқан майталман жолшының кейінгі буын жастарға берер үлгісі де, өнегесі де мол. Биылғы жұмысшы жылында Семей магистральдық жел бөлімшесі тәжірибелі жолшының еңбектегі жолын жаңа толқынға үлгі етуде.