Әке жолын жалғаған ұл

Семей темір жолындағы вагон қараушылар арасында пойыз апатының алдын алып, ерлікке пара-пар іс жасаған жігіттер жетерлік. Солардың арасында Семей вагон пайдалану депосының жас буын вагон қараушысы Диас Маметовтің есімін ерекше атауға болады.

Диас осы қызметке он жыл бұрын өз әкесі, дәл осы депода еңбек ететін Құмар Маметовтің шақыруымен келіпті. Осы аралықта аса ауыр апатқа әкеліп соғуы мүмкін екі ақаулықты анықтап, ер атаныпты. Ол тапқан күрделі емес кінәраттар қаншама… Соңғы жолы жүк вагонының арбасындағы жарықшақты тауып алып, жылжымалы құрамның рельстен шығып кетуінің алдын алды. Ақауы бар вагон дереу ағытылып, жөндеуге жіберілді. Тексерулер қорытындысында дәлелденгендей, егер ақаулық дер кезінде еленбей өтіп кеткенде үлкен шығын болатын ауыр апаттың орын алуы әбден ықтимал еді.  

– Келіп тоқтаған вагондарды тексеру барысында аса мұқият болу керек. Балға мен қатар ұлғайтқыш әйнек, фонарьды да қолдан тастауға болмайды. Нұсқаулыққа сәйкес әрекет етудің түбі берекет, – дейді бұл ретте Диас Құмарұлы.

Сөзге жоқ, іске бекем Диас әлеуметтік желілерге тіркемеген екен. Жұмыстың қара нары. Бүгінде Семей техникалық қызмет көрсету бекетінің тақ паркінің солтүстік қосынында еңбек етеді. Әр кезекшілікте тәулігіне 15-17 жылжымалы құрамды толыққанды тексеріп, алыс жолға шығаратын кездері аз болмайды. Десе де, Диас пен оның әріптестері үшін мазасыз маусым енді басталады. Күз айларынан бастап бөлімше бойынша көмір тасымалы күрт артатын болады. Демек қырағылықты да арттыру қажет.  

Жүрек қалауымен келген осынау қызмет барысында вагон шаруашылығының саңлақтары Ерзат Хасенов, Дәурен Ақатаев, Дайырбек Досановтардың тәлімін көріп, тәжірибесін бойына сіңіріпті. Қызмет барысында үлгі тұтатын ұстаздары көп. Үнемі үйренсем, меңгерсем деген ой өз кәсібіне адал, ізденімпаз жасты тұрақты түрде білім шыңдауға жетелейді екен.

Әйтсе де, Диас үшін адастырмас бағдар осынау қызметте, вагон шаруашылығында елеулі жылдар бойы еңбек етіп, жуырда ғана зейнеткерлікке шыққан өз әкесі Құмардың көрсетіп беріп кеткен тағылымы. Әлі де ақыл-кеңесін сұрап тұрады. Үнемі ізденуден жалықпайды. Бөлімше көлемінде өтетін барлық семинарлар мен техникалық дәрістердің ешбірін жіберген емес. Республика көлемінде вагон шаруашылығы саласындағы орын алған соңғы жаңалықтардан да жақсы хабардар. Ал бос уақытында спортты серік етеді. Әсіресе футбол  ойынын ерекше жақсы көреді. Бөлімше көлемінде өткізілген көптеген сайыстарға қатысып, тартысты додаларда өз командасын алға сүйреп жүр.