«Жас үздік маман – 2025»: Теміржолдағы жаңа буын көшбасшылары

Еліміздің көлік инфрақұрылымының басты күре тамыры саналатын теміржол саласында жыл сайын жаңа буын жас мамандар өсіп келеді. Солардың кәсіби әлеуетін арттыру, жұмысшы мамандықтарының беделін көтеру және үздіктерді анықтау мақсатында «Қазақстан темір жолы» ұлттық компаниясы бесінші жыл қатарынан «Жас үздік маман» республикалық кәсіби байқауын өткізді, деп хабарлайды Rail-news.kz.

Биылғы байқау Мемлекет басшысы жариялаған Жұмысшы кәсіптер жылы аясында ұйымдастырылып, еліміздің барлық өңірлерінен ең үздік жас теміржолшыларды Астанаға жинады.

Іс-шараны ҚТЖ аппараты басшысының м.а. Ерлан Амандықов пен «ҚТЖ-Жүк тасымалы» ЖШС бас директорының орынбасары Асан Үмбетов ашып, жастардың кәсіби өсімі мен тәжірибе алмасуындағы мұндай байқаулардың маңызын атап өтті.

Сынақ пен сын – шыңдалуға мүмкіндік

Республикалық кезеңге дейін әр өңірде аймақтық турлар өткен. Соның нәтижесінде үздік шыққан қатысушылар ғана Астанаға жолдама алған. Олар бес негізгі мамандықты ұсынды:

Жол шебері

Жолаушылар вагонының жолсерігі

Тасымалдау құжаттарын өңдеу жөніндегі оператор

Жылдамдық өлшегіш таспаларды тарқату жөніндегі инженер

Вокзал бойынша кезекші

Қатысушылардың барлығы — 35 жасқа дейінгі теміржолшылар. Бұл жас шектеу бекер емес: байқау ең алдымен жастардың қабілетін ашуға және кәсіби өсуге ынталандыруға бағытталған.

8–9 қазан күндері өткен байқау екі кезеңнен тұрды. Бірінші күні қатысушылар теориялық сынақтар тапсырып, компьютерлік тест арқылы өз саласы бойынша білімін дәлелдеді. Ал екінші күні теміржол нысандарында практикалық тапсырмаларды орындады.

Байқау кезінде тәжірибелі сарапшылар мен өндіріс ардагерлері қатысушылардың жұмысын бақылап, нақты жағдайдағы шешім қабылдау қабілетін, еңбек мәдениетін және қауіпсіздік ережелерін сақтау деңгейін бағалады.

«ҚТЖ» ҰК» АҚ әлеуметтік саясат департаментінің менеджері Ержан Жаналиевтің айтуынша, байқаудың басты мақсаты – жастар арасында жұмысшы мамандықтарына деген қызығушылықты арттыру және қоғамдағы еңбек адамының беделін күшейту.

«Теміржол – техникалық тәртіп пен дәлдікті талап ететін сала. Мұндағы әрбір шебердің еңбегі – ел экономикасының ілгерілеуіне үлес. Сол себепті біз жұмысшы мамандықтарына жаңа көзқарас қалыптастырғымыз келеді. “Жас үздік маман” – соның бір жарқын дәлелі», – деді ол.

Байқауға қатысушылар сондай-ақ «Таза Қазақстан» акциясына қолдау білідіріп, Оқу орталығының аумағына ағаш отырғызып экологияны тазартуға өз үлестерін қосты. 

Жеңімпаздар мен үздік нәтижелер

Қорытынды кезең марапаттау рәсімімен аяқталды. Байқаудың барлық қатысушыларына алғыс хаттар мен сыйлықтар табыс етілді, ал үздіктер арнайы дипломдармен және естелік белгілермен марапатталды.

«Вокзал бойынша кезекші» аталымында:

🥇 Зәмзәгүл Қарақұлова (Арал теңізі станциясы)

🥈 Еркебұлан Қасымхан (Алматы-1)

🥉 Әйгерім Қайнарқызы (Жаңа Семей)

«Жол шебері» аталымында:

🥇 Жалғас Якубов (Қызылорда жол дистанциясы)

🥈 Бауыржан Қыпшақбаев (Қазалы жол дистанциясы)

🥉 Ерасыл Адайбек (Алтынкөл жол дистанциясы)

«Тасымалдау құжаттарын өңдеу жөніндегі оператор» аталымында:

🥇 Екатерина Мухина (Павлодар станциясы)

🥈 Софья Плясунова (Өскемен станциясы)

🥉 Әмина Игембердиева (Үштөбе станциясы)

«Жылдамдық өлшегіш таспаларды тарқату жөніндегі инженер» аталымында:

🥇 Аяужан Асқарқызы (Қызылорда жүк тасымалдау бөлімшесі)

🥈 Айдана Төлеуханова (Алматы жүк тасымалдау бөлімшесі)

🥉 Ақмарал Жақаева (Жамбыл жүк тасымалдау бөлімшесі)

«Жолаушылар вагонының жолсерігі» аталымында:

🥇 Юлия Волокитина («Жолаушылар тасымалы – Экспресс» АҚ)

🥈 Әрсен Қайрат

🥉 Қайнар Үшкемпір

«Теміржол – өмірлік мектеп»: Жас мамандардың пікірі

Жеңімпаздардың бірі, Қызылорда жол дистанциясының шебері Жалғас Якубов бұл байқаудың жас теміржолшылар үшін ерекше мүмкіндік екенін айтады.

«Байқау барысында өзімді жаңа қырдан таныдым. Бірінші күні тест сұрақтары күрделі болды, кейбірі өндірістегі сирек кездесетін жағдайларға арналған. Ал екінші күні тәжірибелік тапсырмаларда нақты шешім қабылдау қабілетіміз сыналды. Осындай байқаулар бізді дамуға, үздік болуға итермелейді», – дейді ол.

«Қазақстан темір жолы» ҰК» АҚ соңғы жылдары кадр саясатына ерекше назар аударып отыр. 2023 жылдан бері қызметкерлердің кәсіби біліктілігін арттыруға арналған «ҚТЖ Академиясы» жұмыс істейді. Бұл орталықта жыл сайын мыңдаған маман қайта даярлаудан өтеді.

Сонымен қатар компания өндірістік қауіпсіздік, автоматтандыру және цифрлық технологиялар бойынша халықаралық серіктестермен бірлесіп оқыту бағдарламаларын енгізуде. Жастарды тарту үшін колледждер мен техникалық университеттермен дуальды білім беру жобалары іске қосылған.

«Жас үздік маман» байқауы – тек кәсіби сайыс емес, ол еңбектің қадірін ұғындыратын, теміржолшылардың бірлігін арттыратын маңызды дәстүрге айналды.

Бұл байқауда жеңіске жеткен әрбір жас – өз аймағының, өз ұжымының мақтанышы. Ал олардың табысы – ел көлігі мен логистикасының болашағының кепілі.