Арыстық аға электр механигі «Құрметті теміржолшы» атанды
«Қазақстан темір жолшысы» газетінің тілшісі
Арыс белгі беру және байланыс дистанциясының аға электр механигі Дәулетбек Дәрменбековтің бір мекемеде табан аудармай еңбек етіп келе жатқанына 34 жылдан асты. Кейіпкеріміз биылғы төл мереке қарсаңында «Құрметті теміржолшы» төсбелгісімен марапатталды. Саланың ең жоғары кәсіби атағына ие болып отырған теміржолшылар әулетінің өкілі өз ісінің нағыз маманы саналады. Вагон қараушы болған әкесі өмірден ерте өткен екен. Балалары түгел әке жолын қуып, теміржол саласында жұмыс істеуде. Дәулетбек те мектеп бітірген соң Арыста бір жылдық курсты оқып, 1987 жылы станциядағы белгі беру және байланыс дистанциясына электр монтері болып жұмысқа кіреді. 2005-2008 жылдары теміржол колледжінен теориялық білім алады. Қазір ол станцияның сұрыптау дөңесінде аға электромеханик болып жұмыс істейді. – Тоғыз жолдың торабы Арысқа теміржол келгелі ғасырдан асты, сондықтан теміржолшы кәсібі кең таралған. Қазақстан ғана емес ТМД бойынша ең ауыр жүктерді ауыстырып тиеу сонау Кеңес кезеңінен бері осы станцияда жүзеге асырылады. Міне, біз де өзіміздің сұрыптау дөңесінде үш бағытта пойыздар жіберу барысында барлық белгі беру құрылғыларының жұмысын қадағалаймыз. Бағыттама бұр- маларының жұмысын бақылауда ұстаймыз. Дөңесте 24 жұмыс- шы бар. Дөңесте пойыздарды сұрыптаған кезде бір белгі беру құрылғысы дұрыс жұмыс істемесе, барлық жұмыс тоқтайды. Сондықтан өз қызметімізді өте маңызды деп санаймыз. Әрі мақтан етеміз, – дейді «Құрметті теміржолшы» атанып жатқан Дәулетбек Дәрменбеков. Бүгінде ердің жасы елуге енді келген жігіт ағасы талай жылғы еңбегін елеп жатқан ұлттық компания басшылығына, өзінің тікелей басшыларына алғысын білдіреді. Бес баланың әкесі адал еңбектің бағалануы әр адамның өз ұрпағының алдындағы мерейін өсіріп, мәртебесін көтеретінін жеткізді.