Өрт сөндіру пойызы ғимараттан шыққан қызыл жалынмен күресті

Болашақ станциясындағы өрт сөндіру пойызы биылғы жылдың бірінші жоспарлы оқу-жаттығуын өткізді. Дайындықтарын пысықтап, дағдыларын жетілдіру жұмысы Маңғыстау жол дистанциясының табельдік ғимаратынан шыққан өрт ошағын сөндіруге бағытталды.

Әрине, шын мәнінде алдын ала белгіленген сценарий бойынша тұтанған қызыл жалын нысанның төбе жабындысында пайда болып, соңы өртке ұласты. Оны ауыздықтауға өрт сөндіру пойызынан 9 адам, жалпы барлығы 28 адам қатысты. Үш техника жұмылдырылды. Бірнеше құрылымның жұмыла әрекет етуінің нәтижесінде жоспарлы жаттығу ойдағыдай атқарылды. Бас-аяғы 45 минутқа созылған жаттығу өз дәрежесінде өтті деп бағаланды.  

Өрт сөндіру пойызы өкілдерінің айтуынша, бұл жолы олар ғимаратта шыққан өртті өшірген болса, келесіде нысана басқа болуы мүмкін. Себебі жылына жоспарлы түрде төрт рет өтетін оқу-жаттығудың бірі-бірін қайталамайтындай ұйымдастырылады екен. Мысалы, бірінші тоқсанда ғимараттан өрт шықса, екіншіде дала өртін сөндіріп, үшіншіде тілсіз жау жолаушылар пойызында тұтануы мүмкін.  

– Болашақ өрт сөндіру пойызы 2012 жылы құрылды. Содан бері айына өрт сөндіру пойызымен 8 рет, өрт сөндіру автокөлігі бойынша 16 рет техникалық-тәжірибелік сабақтар өткіземіз. Соған қоса жылына 4 рет осындай оқу-жаттығу жұмыстары өтеді. Оның бәрі өз уақытымен, белгіленген көрсеткіштер бойынша ұйымдастырылады. Жаттығу – дайындық сабағы, әрқашан формада болуды қамтамасыз ететін басты көрсеткіш, – дейді Болашақ өрт сөндіру пойызының өрт жеңдерін жөндеу шебері Ерболат Бытыков.  

Болашақ өрт сөндіру пойызында бүгінгі таңда 10 адам еңбек етеді. Мекеме меншігінде бір «Камаз» автокөлігі мен бір өрт сөндіру пойызы бар. Автокөлік 8 тонна су, 400 келі көбікпен, ал пойыз болса 100 тонна су, 10 мың тонна көбікпен қамтылған.