Өткелдерге бейнекамера орнатылуда

«ҚТЖ» ҰК» АҚ Магистральдық желі дирекциясы филиалы «Интер Трейд Систем» ЖШС-мен көлік жүргізушілері жол қозғалысы ережесін жиі бұзатын теміржол өткелдеріне 10 аппараттық-бағдарламалық «Бүркіт» жиынтығын орнатуға қатысты келісім жасады.

Талдау деректеріне сүйенсек, өткелдерде апаттық жағдайлар негізінен автокөлік жүргізушілерінің кінәсінен орын алады. Сондықтан теміржолшылар тарапынан 54 теміржол өткеліне тексеру жүргізіліп, нәтижесінде видеофиксатор орнату кезек күттірмейтін 10 өткел анықталған.  

– Желтоқсан айында Астана станциясының екі өткелі пилоттық режимде бейнебақылау камераларымен жабдықталды. Қаңтар айында екі камера Жаңа-Қарағанды – Майқұдық аралығына және Қарағанөзек станциясының өткеліне орнатылды. Ал ақпан айында пойыздар ағыны толассыз жүріп жататын Алматы магистральдық желі бөлімшесінің Ақсеңгір – Шамалған, Байсерке – Жетісу, Ақсеңгір – Бурундай және Байсерке станциясына да аталған құрылғылар орнатылды. Сондай-ақ Жамбыл магистральдық желі бөлімшесі аумағындағы қауіпті өткелге де қойылыпты. Барлығы төрт өңір бойынша 9 өткелге су жаңа бейнекамералар орнатылған. Бірінші тоқсанның соңына дейін Семей магистральдық желі дирекциясының жол аралықтарына да ереже бұзушылықтарды тіркейтін құрылғыларды орнату жоспарланып отыр, – дейді Магистральдық желі дирекциясының қауіпсіздік жөніндегі атқарушы директоры Бахытбек Алдажаров.  

Бахытбек Мұқашұлының айтуынша, аппараттық-бағдарламалық жиынтықты сынақтан өткізу барысында ағымдағы жылдың 1-24 ақпан аралығында 528 614 автокөліктің өткені тіркелген. Оның ішінде 10 068 автокөлік жүргізушісі өткелде бағдаршам тыйым салған белгіге және «тоқта» сызығынан асып өтіп, қозғалыс қауіпсіздігі ережесін өрескел бұзғаны белгілі болып отыр.  

– Пойыздардың қозғалыс қауіпсіздігін қамтамасыз ету – күн тәртібіндегі басты мәселе. Күзетілетін және күзетілмейтін теміржол өткелдерінде жол қозғалысы ережесін қатаң ұстану ескертіледі. Биылғы екі ай ішінде еліміз бойынша 6 жол-көлік оқиғасы орын алды. Өткелдерге бейнекамера орнатылуы ереже бұзған көлік жүргізушілерді анықтап, оларға қатысты әкімшілік және қылмыстық жауапкершілікті күшейтуге мүмкіндік береді деп ойлаймыз, – дейді дирекция өкілі.  

Қазір «ҚТЖ» ҰК» АҚ мен мемлекеттік орган – Теміржол көлігіндегі ішкі істер департаменті темір жол бойында және өткелдерінде болып жататын оқыс оқиғалардың алдын алу үшін күш біріктіріп, бірлесе жұмыс істеуде. ҚР ИИДМ мен ҚР ІІМ арасында 2022-2026 жылдарға арналған Жол картасы жасалған. Ал өткен айда Ұлттық компания басшылары мен теміржол көлігіндегі ішкі істер департаменті өкілдерінің қатысуымен кеңейтілген жиын өтіп, онда қозғалыс қауіпсіздігін бұзып, жол-көлік оқиғаларын жасаған, темір жолда белгіленбеген жерден кесіп өтіп, теміржол белдеуінде мал баққан кінәлі тұлғаларға әкімшілік және қылмыстық жауапкершілікті күшейту мақсатында «Әкімшілік құқық бұзушылық туралы» ҚР Кодексінің айыппұлдарды ұлғайту бөлігіне өзгерістер енгізу туралы мәселені қарауға ұсыныс жасалғаны айтылды.