Жолдағы жауапкершілік: Әр азамат нені білуі тиіс?

Пойызда қанша жолаушы болса, сонша тағдыр бар. Олар сапар барысында түрлі қызықты және келеңсіз оқиғаларды туындатуы мүмкін. Мұндайда іске желілік полиция қызметкерлері араласатын да жайттар кездеседі.

Сайөтес станциясындағы желілік полиция бөлімшесінің бастығы Нұрлыбек Рахметовтің айтуынша, жақында желілік полиция бөлімшесінің қызметкерлері жолаушы пойыздарын аралап, заң мен тәртіп қағидасына орай кезекті профилактикалық түсіндіру жұмыстарын жүргізді.  

– Заңдылық пен тәртіп кез келген жерде сақталуы шарт. Сондықтан біздің бұл іс-шарамыздың басты мақсаты құқықтық сананы қалыптастырып, полицияға сенімді арттыруға бағытталды. Әр азамат қай жерде болмасын өзіне және қоғамның басқа мүшелеріне қолайлы жағдай жасау үшін өз жауапкершілігін сезініп, заңды сақтауы тиіс. Профилактикалық жұмыстар барысында пойыздағы жолаушыларға осы бағытта түсінік беріліп, жолда жүру тәртібін бұзбауы, қоғамдық орында өзін лайықты деңгейде ұстап, жанындағы адамдардың тыныштығына кедергі келтірмеуі, өзінің құнды заттарына сақ болуы керектігі сияқты ережелер ескертілді. Жолда жүру тәртібін бұзып, қоғамдық орында ішімдік ішіп мас болып жүргені үшін 4 адамға, түнгі мезгілде жолаушылардың тыныштығын бұзғаны үшін тағы 2 жолаушыға әкімшілік хаттама толтырылып, пойыз бастығының актісімен пойыздан түсірілді, – дейді Нұрлыбек Рахметов.  

Желілік полиция жұмысының қызығы да, шыжығы да жетеді. Біреу әмиянын немесе ұялы телефонын жоғалтып, сөмкелерін ұмытып кетіп, ауыстырып кетіп хабарласады.  

– Бірде үйіндегілерге айтпай жолға шыққан денсаулығы нашар қарияны кездестірдік. Ауруы асқынып, жолаушыларға кедергі келтіргесін қарт кісіні әрі қарай қызметтік көлігімізбен жеткіздік. Баласын іздеп тауып, әкесін тапсырдық. Әр күніміз осылай, түрлі жағдайдың ортасында өтеді. Ең бастысы жолаушылардың қауіпсіздігі үшін қызмет етудеміз, – дейді Сайөтес желілік полиция бөлімшесінің бастығы Нұрлыбек Рахметов.