Метоллоломнан табылған жез қоңырау
Ақтөбе облысы бойынша меншікті тілші
Қандыағаш қаласындағы Мұғалжар аудандық тарихи-өлкетану музейінде бір кездері пойыз қозғалысын хабарлаған жез қоңырау сақтаулы тұр. Ғасырдан аса тарихы бар жәдігер кездейсоқ табылған.
Музей директоры Шамшат Әбдірзақов оны металл қабылдайтын орыннан тауып алыпты. Қоңыраудың бетінде «МПС» деген жазу бар.
– Металлолом арасынан көненің көзі көзіме оттай басылды. Өткен ғасырдың алғашқы жартыжылдығында шыққан дүние деп болжам жасадық. Қандыағаш станциясы 1905 жылы ашылғанын білеміз. Көзкөргендер соғыстың алдында осындай жез қоңыраулар әр станцияда, пойыздар келіп кеткенде соғылып тұрғанын айтатын еді. Бұл қоңырау сол кезеңдерде пайдаланылғаны сөзсіз, – дейді музей директоры Шамшат Әбдірзақов.
Мұғалжар ауданының орталығы Қандыағаш қаласында орналасқан музей тарихи экспонаттарға бай. 2000 жылы ашылған мұражайда бүгінде 5600 астам жәдігер сақтаулы. Экспонаттардың басым бөлігін музей қызметкерлері өздері іздеп тауып, жинақтаған.
Музейдің Даңқ залында соғыс және еңбек ардагерлерінің фотосуреттері, жеке тұтынған заттары мен құжаттары қойылған. Сондай-ақ теміржолшыларға арналған арнайы бұрыш бар. Бұл бөлім түгелдей Қандыағаш станциясының тарихына арналған. Мұнда теміржолшылар әулеттері, бірнеше буыннан бері осы салада еңбек еткен династиялар туралы деректер мол жинақталған. Теміржолшылар күнделікті пайдаланған бұйымдар да қойылған.