М. Тынышпаев пен Т. Рысқұловқа ескерткіш орнатылды
Шымкент қаласы бойынша меншікті тілшісі
Осыдан үш жыл бұрын Түлкібас ауданының 90 жылдық мерейтойына орай станциядағы теміржол вокзалының алдында қазақ халқының қос арысы Мұхамеджан Тынышпаев пен Тұрар Рысқұловтың ескерткіштері ашылды. Ескерткіш демеушілер мен ұлы тұлғалардың бүгінгі ұрпақтары, жергілікті әкімдік көмегімен салынған және ескерткіштің Түлкібаста бой көтеруі заңдылық дер едік. Себебі, екі тұлғаның қазақ теміржолы, оның ішінде Түлкібас өңірімен байланысты өз тарихы бар. Тарихқа көз жүгіртсек, 1915 жылы Арыстан Түлкібасқа дейін темір жол құрылысын басқарған қазақтың тұңғыш теміржол инженері М.Тынышпаев пен жас Т.Рысқұлов алғаш рет осында кездесіп, танысқан екен. Тынышпаев оқуға жағдайы жоқ, бірақ білімге құштар жас жігітке қаражат тауып беріп, болашағына жол сілтеген деседі. Ал Түркістан-Сібір темір жолының құрылысы басталмай тұрып жобаға тәжірибелі инженер және жергілікті жердің ой-шұңқырын, ерекшеліктерін жақсы білетін маман ретінде Тынышпаевты тартқан Тұрар Рысқұлов екені де белгілі. Қазақтың қос арысы Түрксіб құрылысында Шоқпар жобасын қалай қорғағаны, Алматы станциясының орнын таңдаудағы еңбектерімен тарихтан таныспыз. Жалпы Түлкібас өңірі Шілмембет руынан тарайтын Тұрар Рысқұловтың ата-бабасының қонысы екені де белгілі. Түлкібас вокзалының алдында тұрған қос арыстың ескерткіші, әрине, биік сәулет өнері болып табылмас, бірақ жергілікті халықтың арыстар рухына деген құрметі мен тағзымы деп білген жөн.