Семей шаһарындағы теміржол вокзалы барлық талапқа сай ма?
Шығыс Қазақстан облысы бойынша меншікті тілші, Семей
Жаңа облыстың орталығына айналған Семей шаһарындағы теміржол вокзалы барлық талапқа сай ма? Көркейту мен аумағын абаттандыру, ең бастысы жолаушылар үшін жасалатын қолайлылық қандай? Бұл жайында Абай облысы әкімдігі мен вокзал шаруашылығы басшыларының кездесуінде айтылды.
Жуырда жаңа облыс басшылығы алғаш рет Семей вокзалына келіп, ондағы іс-шаралар қатарымен, теміржолшылардың күнделікті қызметімен танысты. Лауазымды тұлғаларды қарсы алған Семей магистральдық желі бөлімшесі басшысының орынбасары Азат Санмұратұлы алдағы атқарылатын жоспарлы шаралармен, осыған дейін жүргізілген жұмыстармен таныстырды. Облыс басшылығы вокзал бекетінің күту залы, билет кассалары және вокзал перронында болып, қалыптасқан ахуалға қанықты. Бұл орайда әкімдік өкілдері алдағы уақытта тиісті ұсыныстар әзірлемек.
– Облыс орталығына жолы түскен қонақтар ең алдымен вокзалға келеді. Теміржол бекеті мен автобекет қаламыздың айнасы іспеттес. Сондықтан ең алдымен қала қақпасы дұрыс болуы керек. Бірқатар мәселелер бар екен, оларды шешу бойынша жұмыстар жүргізілетін болады, – деді бұл орайда пікір білдірген Абай облысы әкімінің бірінші орынбасары Нұрбол Нұрсағатов.
Десек те, биылғы жылы салынғанына жарты ғасыр толатын, жалпы тарихы 108 жылды құрайтын вокзал қызметіне жолаушылар қауымы риза.
– Ағымдағы жылғы вокзалдың 50 жылдық мерейтойына орай Семей магистральдық желі бөлімшесінің вокзал шаруашылығы бірқатар іс-шараларды қолға алмақ. Соның ішінде, жолаушыларға көрсетілетін қызмет сапасын арттыру бірінші кезекте тұр. Алдағы уақытта вокзал бойынша мүмкіндігі шектеулі адамдар үшін толықтай жағдай жасалып, брайль тақтайшасы, шақыру түймешіктері қойылатын болады. Яғни, атқарылатын жұмыстар көп алда, – дейді вокзал бастығы Есет Қажығұлов.
Бұл бағыттағы жұмыстар ағымдағы жылдың өткен маусым айынан бастап қолға алынуда. Сонымен қатар, теміржолшылардың кәсіби мерекесіне орай бірқатар межелі шаралар да ұйымдастырылатын болады. Бұйырса, жарты ғасырлық мерейтой қарсаңында баршаға жаңарған, заманауи талаптарға сай теміржол вокзалы қызмет көрсететін болады. Бұл орайда теміржолшыларға облыс әкімдігі елеулі көмек көрсетпек.