Оңтүстікке де талай жыл болмаған қыс келді
Түркістан облысы бойынша меншікті тілші
Биылғы қыс еліміз үшін жеңіл тиіп отырған жоқ. Қаңтарда қаһарына мінген «кәрі құда» үсті-үстіне жауған қалың қар, қатты суық, үскірік аяз алып келді. Еліміздің солтүстік пен шығыс, батыс және орталық аймақтарымен қоса биыл оңтүстікке де талай жыл болмаған қыс келді.
Оңтүстік өлкеде қыс мезгілінде қардың қалың түсуі сирек қездесетін құбылыс екені өз алдына, ауа температурасының – 25-30 градусқа дейін төмендеуі төтенше жағдай болып табылады. Оңтүстіктің ылғалды атмосферасында бұл дегеніңіз арқаның қырық градус аязынан бір де кем емес. Сондықтан қаңтардың алғашқы онкүндігінде қалың қар мен қатты аяз бүкіл Түркістан облысын қатты әбігерге салды. Тұңғыш рет мектептерде сабақ тоқтатылып, қоғамдық көліктер жүрмей қалды. Ауа райын болжау орталығы өкілдерінің айтуынша, мұндай жағдай осыдан 49 жыл бұрын тіркелген екен.
– Соңғы екі жұмадан бері табиғаттың тосын мінезінен келетін зардап, залалды азайту мақсатында тынбай жұмыс істеп жатырмыз. Қыстыгүні жеміс ағаштары гүлдеп, бәйшешек бүр жарып жататын оңтүстіктің жаймашуақ табиғаты биыл тосын мінез танытып тұр. Дала да, қала да қатты аяздан қатып қалды. Тек біздің теміржолшылар күндіз-түні тынымсыз қызмет етіп, пойыздар қозғалысын тоқтатпай, инфрақұрылымның үздіксіз жұмысын қамтамасыз етіп отыр, – дейді Шымкент жол дистанциясының бас инженері Нұржан Жарылқапов.
Үшінші мегаполистегі теміржол станциясының жұмысы әдеттегідей жүріп жатыр. Бірі келіп, бірі кетіп жатқан құрамдар, жүк парктерінде вагондардың бірін алып, бірін салып, пойыз құрастырып жөнелтіп жатқан теміржолшылар. Әне, Шымкент жол дистанциясының жұмысшылары станция жолдары мен стрелка бұрмаларының қарын тазалап жүр...
«Қардың әдеттегіден көп түсуіне байланысты дистанция ұжымы арнайы кезекшілікпен жұмысқа шықты. Мәселен, соңғы бір аптада қар тазалаудың күндізгі ауысымына 40 жұмысшы шықса, түнгі ауысымға 58 маман жұмылдырылып отыр. Станция жолдарына ауыр техниканы жұмылдыру мүмкін емес. Барлық жұмыс тек адам қолымен іске асырылып, адам көзімен қадағалануы тиіс. Ал техника магистраль мен трассалар қарын тазалауда», – дейді бас инженер.