«ҚТЖ-Жүк тасымалы» ЖШС: Өндірістік нысандар жаңартылуда
Абай облысы бойынша меншікті тілші
Жыл басынан бері «ҚТЖ-Жүк тасымалы» ЖШС бойынша барлығы 53 өндірістік нысан жаңартылды. Солардың бірі Семей ЖТ бөлімшесіне қарасты 1-ші класты Аягөз станциясындағы бағыттамалық бұрма қосындарының толыққанды күрделі жөндеуден өтуі маневрлік жұмыстарды үйлестірудің тиімділігін арттырды.
Бүгінде солтүстік айналымдағы №1 бағыттама посты жүз пайызға жаңарып, бастан-аяқ қайтадан салынды. Мердігер мекеме «Теміржол Су-Аягөз» ЖШС құрылыс жұмыстарын діттеген мерзім ішінде сапалы орындап шықты. Жүргізілген жұмыстар барысы бөлімше басшысы Владимир Бабиченконың қатаң назарында болды.
Шатырланып, сәнді кірпішпен қапталып, жылыту жүйесі де жаңарған нысанның есік-терезелері мен еден-қабырғаларына дейін жаңадан салынды. Ендігі аралықта қосын кезекшілері қыстың аязында от жағып, күл шығарып жүрмейді. Шағын ғана ғимарат экологиялық талаптарға сай электр қуатымен жылытылады. Бөлмедегі ауа температурасын реттеуге де мүмкіндік бар.
Қосын кезекшілері үшін тұрмыстық қажеттіліктер де алынды.
Әйтсе де, маңызды жайт – пост қызметінің де тың жолға қойылуы болып отыр. Орталықтандырылған бағыттамалар жұмыстарын басқару енді осында үйлестіріледі.
– Соның нәтижесінде бүгінде маневрлік жұмыстарды басқарудағы тиімділік айтарлықтай арта түсті. Мұнымен қатар, пост кезекшісіне станция басындағы пойыз құрастырушылардың жұмыс барысын ұдайы назарда ұстауға да мол мүмкіндік береді, – дейді Аягөз станциясының бастығы Нұржан Жақанов.
Дәл қазіргі күндері Аягөз станциясы бойынша бос вагондарды қабылдап алу мен жөнелту ісіне басымдық берілуде. Сондай-ақ, көршілес бөлімшелерге, атап айтқанда Алматы және Балқаш станцияларына пойыздар құрастырып жөнелтуде, жалпы қозғалыс саласындағы өндіріс барысында солтүстік айналымдағы бағыттама қосынының маңыздылығы аса жоғары.
Ауысым бойынша кезекпен жұмыс істейтін пост кезекшілерінің жұмысы қауырт. Пойыз қозғалысының қауіпсіздігін сақтау барысында олардың еңбегі жоғары деңгейдегі жауапкершілікті талап ететіні белгілі. Бір мысал – бағыттамалы бұрмалардың техникалық жай-күйі пойыздарды қабылдап-жөнелтумен бірге қатаң назарда ұсталады. Аягөз станциясындағы №2 бағыттама қосыны да ағымдағы жөндеуден өткізілген болатын. Станцияның техникалық кеңсесі де жөндеуден өтіп, қазіргі таңда жұмысы ширай түскен.
Өндіріс барысын жүйелі жүргізу үшін жайлы да заманауи жұмыс орнының маңызы зор екені белгілі. Бұл орайда Аягөз станциясында теміржолшылар игілігі үшін осындай іс-шаралар соңғы жылдары көтпеп қолға алынуда.