Маңғыстау локомотив депосы паркінің қысқы маусымға дайындығы қандай?

Түбек теміржолы бойынша жүк және жолаушы тасымалын тартым құралымен қамтамасыз етіп отырған Маңғыстау локомотив депосы паркінде бүгінде 58 тепловоз қолданыста. Олар күзгі байқаудан өтіп, қысқы маусымға сақадай сай дайындықпен келген.

Маңғыстау локомотив депосының жөндеуді бақылау бөлімінің бастығы Сабит Зияевтың айтуынша, бүгінде депода жүк тасымалы бағытында 37 тепловоз, маневрлік жұмыстарды атқаратын 15, жолаушылар тасымалына қызмет ететін 5 тепловоз пайдаланылуда. Бұл локомотивтер атқаратын функциясына байланысты өз ерекшеліктеріне ие екені белгілі. Мысалы, жолаушылар тасымалына қызмет көрсететін тепловоздарға «ЭПТ» – электр пневматикалық тежегіштер орнатылса, маневрлік жұмыстарға арналғандар бір секциялы, ал жүк вагондарын сүйрейтін локомотивтер қос секциялы.  

Биыл 45 тепловоз күзгі комиссиялық байқаудан өткізіліп, қысқы даярлығы жасалған болса, кейбір себептермен 13 теполовоз күзгі байқау тізімінен алынып қалған. Өйткені олар күрделі жөндеулерге және ұзақ мерзімге консервацияда тұруына байланысты бұл тізімге қосылған жоқ. Сондай-ақ тізімге енбеген тепловоздың тағы бірі есептен шығарылатын ТЭМ сериялы тепловозы екен.  

– Тепловоздарды қысқы мерзімге дайындау жұмыстары өз уақытымен атқарылып, тиісті жөндеулерден өткізілді. Локомотивтер қажеттілігіне қарай өзіміздегі және өзге өңірлердегі жөндеу деполарынан дайындығын алды. 2ТЭ10МК, ТЭМ сериялы 33 локомотив сырланып, жап-жаңа көрініске енді. Жақында ғана толық тексеріліп, осындай жөндеу-жаңарту жұмыстарынан шыққан тепловоздарымыз бүгінгі күні өз қызметін атқаруда. Дегенмен, темір болғасын бір күні болмаса, бір күні ақау шығуы әбден мүмкін. Ондай жағдайда Астанадағы «Қамқор Локомотив» диспетчерлерінен Мақат не Шалқар деполарына сұраныс алынады. Сол бойынша тепловоз ақау нөмірімен пойызға тіркеліп, жөндеуге жөнелтіледі. Маневрлік тепловоздарды Маңғыстаудағы «Ғасыр Маңғыстау» локомотив жөндеу депосына жібереміз. Осында табылған кемшіліктері жойылып, қайтадан пайдалануға беріледі. Сондай-ақ тепловоздарға қыстық майлар да жергілікті жердегі ТҚК-2 жөндеу орнында құйылады, оларға еш шағымымыз жоқ, – дейді Сабит Зияев.