Маңғыстаулық өрт сөндіру пойызы дайындықтарын пысықтады
Маңғыстау облысы бойынша меншікті тілші
Жуырда Маңғыстау станциясында 42-тұйық жолында жолаушылар вагонынан өрт шықты. Тілсіз жаумен күреске өрт сөндіру пойызымен бірге жергілікті азаматтық қорғаудың өртке қарсы бөлімінің қызметкерлері мен техникасы да жұмылып, қызыл жалынды жарты сағатта ауыздықтады.
12 сәуір күні түбек теміржолының Маңғыстау станциясында өткен кезекті тактикалық-арнайы оқу-жаттығудың сценарийі осылай болды. Аталған төтенше жағдайларға дайындықты пысықтау шарасы бекітілген кестеге сәйкес Маңғыстау станциясының өрт сөндіру пойызының қатысуымен «Жолаушылар вагонындағы өртті сөндіру» тақырыбында өтті. Оған Маңғыстау станциясының №48 өрт сөндіру пойызынан бөлек Мемлекеттік өртке қарсы қызметі, Азаматтық қорғаудың өртке қарсы буындары түгел қатыстырылды.
Сценарий бойынша сағат 15.00-де Маңғыстау станциясының өрт сөндіру пойызына Маңғыстау станциясының №42 тұйық жолаушылар вагонындағы өрт туралы хабарлама түсті. Хабарды алған бойда Маңғыстау өрт сөндіру пойызының жеке құрамы жинақталып, оқиға орнына келді. Сағат тілі 15.03 минутты көрсеткенде №5өрт сөндіру бөлімінен 3 (АЦ-40, АЦ-10-70, АЦ-8-70) техника 15 жауынгерлік құраммен келіп жетіп, сағат 15.05-те өртті сөндіруге кірісті.
– Тактикалық оқу-жаттығуымыз өз деңгейінде өтті. Жолаушылар вагонында шыққан өртті толықтай жоюға 32 минут уақыт жұмсалды. Өрт сөндіру бойынша жергілікті қызмет өкілдері бірлесіп, дайындығымызды тексеріп, тағы бір рет пысықтап алдық. Іс-шара барысында өрт сөндіру үшін су және бүріккіш көбік пайдаландық. Өрт сөндіру пойызынан №1 мотопомпадан 20 метрге 1 Магистральдық желі және су беру үшін 2 литер Б жұмыс желісінің тармақтары арқылы тартылды. №2 мотопомпадан 20 метрге 1 Магистральдық желі және бүріккіш көбік беру үшін жұмыс желісі салынды. Нәтижесінде сағат 15.31 минутта өрт ауыздықталып, толықтай өшірілді. Оған барлық қызмет өкілдерін қосқанда, соның ішінде теміржол мекемелерінен де бар, жалпы 92 адам қатысты. 11,520 тонна су жұмсалды, – дейді Маңғыстау мемлекеттік емес өртке қарсы қызмет бастығы Қайырхан Таласов.