Абай тойына дайындық

Биылғы жылы еліміз бойынша бірқатар айтулы шаралар атап өтілетіні белгілі. Соның бірі қазақтың ұлы ойшылы, хакім Абайдың 180 жылдығы кең көлемде тойланбақ. Бұл туралы Мемлекет басшысы Қасым-Жомарт Тоқаев жыл басында сөйлеген сөзінде айтып өткен болатын.

Семей топырағында туған Абай тойы ең алдымен семейліктерге үлкен жауапкершілік жүктейді. Соның ішінде «Театр киімілгіштен басталады» демекші, қаланың бас қақпасы вокзалдың талапқа сай болуы шарт. НЖС-6 – Семей магистральдық желі бөлімшесінің бастығы Айдын Шәукежановтың айтуынша, осы орайда тек Семей емес, байтақ желі бойындағы теміржол нысандары мен вокзалдарды абаттандыру, қайта жаңғырту жұмыстарына айрықша басымдық берілетін болады.  

Жалпы, бұл бағыттағы жұмыстар өткен жылы бастау алған. Жергілікті «Теміржолсу-Аягөз» ЖШС жыл соңына дейін бөлімшеге қарасты 22 ғимаратқа ағымдағы жөндеу жүргізіп, әр кіргізді. Қазіргі уақытта аталмыш нысандардағы жұмыстар толығымен аяқталды. Енді тек күтіп ұстау, абаттандыру, тұрақты түрде тазалық шараларын жүргізіп тұру ғана қалып отыр.  

Сол тәрізді ҚР Көлік министрі М.Қарабаевтың арнайы тапсырмасына сәйкес, мамандандырылған жобалау ұйымы облыс әкімдігімен бірлесіп Семей вокзалының ғимаратын қайта жаңғыртуға, сонымен қатар Өскемен-1 теміржол бекеті және Түрксіб құрылысының туындысы саналатын Аягөз вокзалын күрделі жөндеуден өткізуге жобалық-сметалық құжаттама әзірлеу үстінде. Яғни жолаушылар нөпірі көп қоғамдық орындардың жайлылығы мен сыртқы әрленуіне баса мән берілетін болады.  

Осыған дейін облыс басшылығы мен Семей магистральдық желі бөлімшесі бастығы Айдын Мақсұтбекұлы бастаған топ Семей вокзалы маңында көшпелі кеңес өткізіп, аймақты абаттандыру жоспарын пысықтаған болатын.  

Бұл шаралардың сыртында семейлік теміржолшылар жалпыұлттық «Таза Қазақстан» экоакциясын өткізуді биыл да жалғастырмақ. Шағын станциялар бойынша көшет отырғызу, желі бойының қос қапталына сенбілік ұйымдастыру сынды былтырғы жұмыстар жалғасын табатын болады.